Nelson Mandela air bàsachadh

Nelson Mandela Bhàsaich Mgr Mandela oidhche Dhiardaoin, aois 95.

Tha am fear a bha os cionn na strì airson democrasaidh a thoirt gu Afraga a deas, Nelson Mandela, air bàsachadh.

Bha Mgr Mandela 95 bliadhna de dh'aois, agus 's e a' chiad cheann-suidhe dubh a bh' air Afraga a Deas.

Chaidh naidheachd a' bhàis fhiollseachadh le Ceann-suidhe Afraga a Deas, Jacob Zuma, anmoch oidhche Ardaoin.

Chuir Mgr Mandela 27 bliadhna seachad ann am prìosan air Eilean Robben, faisg air Baile a' Chèap, airson a' phàirt a bh' aige anns an t-strì airson còirichean a thoirt do dhaoine dubha ann an Afraga a Deas.

Apartheid

Thathas ga fhaicinn mar an fhear a thug riaghaltas fo shiostam Apartheid, fo an robh mion-shluagh geal a' cumail smachd air a' mhòr-chuid de shluagh na dùthcha, a bha dubh.

Bha mòran riaghaltasan air feadh an t-Saoghail ga choimhead mar cheannarcach ri linn rudan a rinn am pàrtaidh aige an ANC.

Chaidh a dhèanamh na cheann-suidhe air an dùthaich ann an 1994 - a' chiad cheann-suidhe dubh, agus a' chiad cheann-suidhe a chaidh a thaghadh le muinntir na dùthcha air fad riamh.

Tha ceannardan poileataigeach air feadh an t-Saoghail air luaidh a dhèanamh air.

Thuirt Ceann-suidhe Afraga a Deas, Jacob Zuma: "Tha ar nàisean air a mhac a b' fheàrr a chall, agus tha ar daoine air athair a chall.

"Ged a bha fhios againn gun tigeadh an là seo, cha eil dad a lùghdaicheas am faireachdainn trom, leantainneach annainn gu bheil sinn air call gu mòr."

Thuirt Prìomh Mhinistear na h-Alba, Ailig Salmond, gun robh Mgr Mandela "air a bhith na threòiriche do na milleanan gun chunntadh."

Start Quote

Tha solas soilleir air a dhol às san t-Saoghal.”

End Quote Prìomhaire Bhreatainn, Dàibhidh Camshron

Thuirt Prìomhaire Bhreatainn, Dàibhidh Camshron: "Tha solas soilleir air a dhol às san t-Saoghal.

"B' e laoch mòr ar linne a bh' ann an Nelson Mandela. Dh'iarr mi gun cuirear am bratach os cionn No.10 aig leth-chruinn."

Thuirt a' Bhàn-righ Ealasaid II gun robh i "brònach dha-rìribh" aig an naidheachd.

"Dh'obraich e gun sgìths airson maith a dhùthcha, agus 's e a dhìleab an Afraga a Deas sìtheil a chì sinn an-diugh," thuirt brath oifigeil bho Lùchairt Bhuckingham.

"Tha a Mòrachd a' cuimhneachadh le blàths mòr a cuid choinneamhan le Mgr Mandela, agus a' cur a cuid cho-bhròin a dh'ionnsaigh a theaghlaich, agus mhuinntir Afraga a Deas aig an àm bhrònach seo."

Sgeulachdan aithriseach

What is VOCAB? Deth'ann a VOCAB?

BBC © 2014 Chan eil uallach air a' BhBC airson na th' air làraich-lìn eile.

Gheibhear sealladh nas fheàrr den duilleig seo le sealladair lìn nas ùire agus na duilleagan stoidhle (CSS) air. Ged a chithear susbaint na làraich leis an t-sealladair lìn a th' agaibh, tha sinn a' moladh an dreach as ùire den bhathar-bhog ur sealladair a thoirt a-nuas, no ur duilleagan-stoidhle a chur air ma ghabhas sin dèanamh.