Cion leapannan aig Ospadal nan Eilean

  • 27 An t-Samhain 2013
Bòrd Slàinte nan Eilean Siar
Image caption Tha Comhairle nan Eilean Siar agus am Bòrd Slàinte a' beachdachadh air seirbhisean cùraim a thoirt còmhla fo bhuidhinn stiùiridh ùir.

Tha dragh gum bi cion leapannan aig Ospadal nan Eilean ann an Steòrnabhagh a' ciallachadh nach tèid aca air euslaintich ùra a ghabhail san àm ri teachd.

Tha 18 duine san ospadal an-dràsta a tha deiseil airson a dhol dhachaigh, ach nach urrainn leis nach eil cùram anns a' choimhearsnachd mun coinneimh.

Tha Comhairle nan Eilean Siar agus am Bòrd Slàinte a' beachdachadh air seirbhisean cùraim a thoirt còmhla fo bhuidhinn stiùiridh ùir, ach tha eas-aonta ann eadar an dà sheirbheis mun t-seòrsa buidhne a bu chòir a bhith ann.

Thuirt Cathraiche Comataidh Slàinte 's Cùram Sòisealta na Comhairle, Uisdean Robasdan, gu bheil buill na Comhairle air mòran fiosrachaidh fhaighinn a thaobh a' bheachd a bha a' Chomhairle a' dol a ghabhail, beachdan a thathas air cur air adhart chun nan comhairlean coimhearsnachd.

Tha Mgr Robasdan draghail nach eil buill a' Bhùird Shlàinte fhathast air cluinntinn na tha am Bòrd Slàinte a' cur air adhart aig ìre nuair a dh'fheumas an dà bhuidhinn a thighinn còmhla san aithghearrachd.

"Tha e caran tàmailteach gu bheil a' Chomhairle cho fosgailte mu dheidhinn agus am Bòrd Slàinte cho dùinte," thuirt e.

"Aig deireadh an là, 's e seirbheisean dhan choimhearsnachd a tha sinn a' feuchainn ri thoirt seachad cho math 's as urrainn dhuinn - an dà bhuidhinn."

Mur a tig an dà bhuidhinn gu aonta, tha coltas gur e an Riaghaltas a nì na co-dhùnaidhean dhaibh.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile