Geòidh "nan cunnart" do chroitearachd

  • 29 An Dàmhair 2013
Geòidh
Image caption Tha croitearan ag ràdh gum bi na geòidh a' dèanamh sgrios air talamh àiteachais.

Tha croitearachd ann an Uibhist ann an cunnart ri linn nan gèadh glasa, a rèir Chaidreachas Croitearachd na h-Alba.

Nochd àrd-oifigear na buidhne, Padraig Krause, aig Comataidh nan Ath-chuingean Poblach aig Holyrood Dimàirt.

Chuir an Caidreachas ath-chuinge mu na geòidh air beulaibh na comataidh.

Tha an ath-chuinge, a fhuair taic bho chòrr is 400 duine, ag iarraidh air an Riaghaltas gluasad gu sgiobalta gus dèiligeadh ris na trioblaidean a tha air èirigh bho na th' ann de gheòidh ann an sgìrean croitearachd.

A bharrachd air sin, tha an ath-chuinge airson 's gum beachdaich an Riaghaltas às ùr air an taic-airgid a thathas a' toirt seachad do sgeamaichean gus smachd a chumail air àireamh nan gèadh, agus am bu chòir an tuilleadh a thoirt seachad.

Dh'innis Mgr Krause dhan chomataidh gu bheil na geòidh gu sònraichte nan trioblaid ann an Uibhist.

Thuirt e gu bheil iad a' dèanamh sgrios air àrainneachd phrìseil a' mhachaire is gum faod iad fiù 's cur às do chroitearachd ann an Uibhist uile gu leìr.

Thuirt e gur e buill na buidhne ann an Uibhist a thog an ath-chuinge anns a' chiad dol-a-mach.

Air a' cheann thall dh'aontaich Comataidh nan Ath-chuingean Poblach an gnothach a chur air beulaibh Comataidh nan Cùisean Dùthchail agus na h-Àrainneachd cho luath 's a ghabhas.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile