"Taic do Ghàidhlig far a bheil i làidir"

A' Ghàidhlig Tha Seòras Lyon ag ràdh nach obraich oidhirp gus suidheachadh na Gàidhlig a leasachadh air feadh na h-Alba.

Sgeulachdan co-cheangailte

Bu chòir do Riaghaltas na h-Alba a bhith ag amas air taic a thoirt dhan Ghàidhlig ann an sgìrean far a bheil i làidir, seach a bhith a' feuchainn ri suidheachadh a' chànain a leasachadh air feadh na dùthcha, a rèir ball ann am Pàrlamaid na h-Eòrpa.

Bha an Lib Deamach Seòras Lyon a' bruidhinn agus Pàrlamaid na h-Eòrpa gus bhòtadh Diciadain air aithisg mu mhion-cànain a th' ann an cunnart.

Tha an aithisg ag iarraidh air an Aonadh Eòrpach agus na dùthchannan a tha nam buill dheth a bhith nas mothachaile gu bheil tòrr de chànanan na h-Eòrpa ann an cunnart a dhol à bith, agus làn thaic a chur ri oidhirp gus an glèidheadh agus am brosnachadh.

Buidseat Freagarrach

Thathas ag iarraidh air dùthchannan a bhith a' cur ma seach buidseat freagarrach gus mion-cànain a dhìon, agus gum bu chòir poileasaidhean cànain a stèidheachadh a tha ag aithneachadh cho cudromach 's a tha e gum faigh clann an cànan san taigh.

Thuirt Mgr Lyon gu bheil e a' cur taic ris an aithisg is gun neartaich e an argamaid ann an Alba son taic a bharrachd dhan Ghàidhlig.

'S dòcha gum bi dòigh ann, thuirt e, beagan den airgead Eòrpach a tha a' dol gu Alba a chomharrachadh 'son leasachadh na Gàidhlig.

Dh'innis e ge-tà gu bheil iomagain air mu phoileasaidh Gàidhlig Riaghaltas na h-Alba.

"Mearachd"

"Tha mi a' smaointinn gur e mearachd a th' ann bhon Riaghaltas a bhith a' feuchainn ri Gàidhlig a leasachadh air feadh na dùthcha.

"Tha sin a' cur uidhir de dh'uallach air goireasan is gu bheil cunnart ann gun tèid luchd-labhairt a chall, seach a bhith a' cur ri àireamhan.

"S e an dòigh as fheàrr, nam bheachd-sa, agus 's e mar a rinn an Riaghaltas mu dheireadh, 's e a bhith a' cur prìomhachas air sgìrean far a bheil dualchas Gàidhlig ann, sgìrean far a bheil fios gu bheil iarrtas ann, agus a bhith a' feuchainn ri gnothaichean a neartachadh anns na sgìrean sin.

"Tha mi den beachd ma dh'fheuchas sibh ris an airgead son teagaisg na Gàidhlig a chosg air feadh na h-Alba, gum fàilig e oirbh", thuirt e.

Thuirt Riaghaltas na h-Alba gu bheil iad air am buidseat aca airson na Gàidhlig a chumail aig an aon ìre.

"Leanaidh sinn oirnn ag obair còmhla ri Bòrd na Gàidhlig agus comhairlean airson dèanamh cinnteach gun tèid an t-ionmhas againn gu na sgìrean a chuidicheas sinn ann a bhith a' leudachadh àireamh an luchd-labhairt agus a dh'fhàgas an cànan ann an staid fallain san àm ri teachd," thuirt an riaghaltas.

Tuilleadh mun sgeulachd seo

Sgeulachdan co-cheangailte

Chan eil uallach air a' BhBC airson na tha air làraich-lìn eile.

Sgeulachdan aithriseach

What is VOCAB? Deth'ann a VOCAB?

BBC © 2014 Chan eil uallach air a' BhBC airson na th' air làraich-lìn eile.

Gheibhear sealladh nas fheàrr den duilleig seo le sealladair lìn nas ùire agus na duilleagan stoidhle (CSS) air. Ged a chithear susbaint na làraich leis an t-sealladair lìn a th' agaibh, tha sinn a' moladh an dreach as ùire den bhathar-bhog ur sealladair a thoirt a-nuas, no ur duilleagan-stoidhle a chur air ma ghabhas sin dèanamh.