Pàirc na h-Àirde "sònraichte"

Cupa na Camanachd Tha buidheann-riaghlaidh na h-iomain ag ràdh gum i Pàirc na h-Àirde deiseil 'son là mòr na camanachd.

Thuirt Comann na Camanachd gum bi Pàirc na h-Àirde sa Ghearasdan deiseil 'son na cuairte deireannaich de Chupa na Camanachd.

Thèid Caol Bhòid an aghaidh Bhail' Ùr an t-Slèibh aig An Àird air an 14mh den mhìos.

Bha cuid air ceist a thogail mun phàirc is trioblaidean drèanaidh air a bhith ann roimhe, is chaidh obair mhòr a dhèanamh oirre an-uiridh.

Nochd draghan ùra ge-tà aig toiseach na Lùnastail às dèidh a' gheama eadar Caol Bhòid is Ceann a' Ghiuthsaich san iar-chuairt dheireannaich de Chupa na Camanachd.

A' ceasnachadh

Bha a' phàirc trom an là sin is cuid a' ceasnachadh an robh i math gu leòr 'son geama aig an ìre sin.

Às dèidh làimh chaidh a' phàirc a dhùnadh 'son sia seachdainean is chaidh feur ùr a chur sìos aig na tadhail agus ann am meadhan na pàirce.

A-nise tha Comann na Camanachd ag ràdh gu bheil a' phàirc ann an staid "shònraichte".

"Tha Pàirce na h-Àirde air a bhith cudromach ann an iomain fad bhliadhnaichean agus tha i a-nise cho math sa bha i a-riamh", thuirt Ridseard Gall bho Chomann na Camanachd.

Ceist

Bidh dragh air cuid ge-tà gun robh fiùs ceist ann mun phàirc nas lugha na cola-deug mus bi an geama ann.

"Tha mi a' smaoineachadh gum feum iad dèanamh cinnteach dìreach gu bheil fhios aig daoine dè tha a' tachairt agus nach eil teagamh ann a-nise mun phàirce", thuirt eòlaiche na h-iomain, Uisdean MacIllinneinn.

"Tha iad son dèanamh cinnteach nach bi teagamh sam bith aig duine sam bith - mar eisimpleir aig saoghal an telebhisein - gu bheil an geama a' dol air adhart", thuirt e.

Bidh an comann a-nise an dòchas nach bidh cus uisge ann an Loch Abar eadar seo agus a' chuairt dheireannach.

Tuilleadh mun sgeulachd seo

Chan eil uallach air a' BhBC airson na tha air làraich-lìn eile.

Sgeulachdan aithriseach

  • CofaidhCofaidh is Craic an Glaschu

    Fosglaidh cafaidh ùr ann an Glaschu an ath-mhìos do choimhearsnachd Gàidhlig a' bhaile.


  • DìleasRobo Chù Listen

    Luchd-saidheans ag ràdh gun gabhadh ròbotan a chleachdadh an àite chon-chaorach airson caoraich a bhuachailleachd.


BBC © 2014 Chan eil uallach air a' BhBC airson na th' air làraich-lìn eile.

Gheibhear sealladh nas fheàrr den duilleig seo le sealladair lìn nas ùire agus na duilleagan stoidhle (CSS) air. Ged a chithear susbaint na làraich leis an t-sealladair lìn a th' agaibh, tha sinn a' moladh an dreach as ùire den bhathar-bhog ur sealladair a thoirt a-nuas, no ur duilleagan-stoidhle a chur air ma ghabhas sin dèanamh.