Comhairle ag iarraidh faochadh bho chìs

  • 3 An t-Sultain 2013
Seòmar-cadail
Tha a' Chomhairle airson nach toir a' chìs buaidh air a' Ghàidhealtachd.

Tha ceannardan Chomhairle na Gàidhealtachd a' sgrìobhadh gu Buill-Phàrlamaid na sgìre ann an Westminster ag iarraidh faochadh anns na sgìrean dùthchail bho "chìs nan seòmraichean-cadail".

Thuirt a' Chomhairle gu bheil iad dòchasach an dèidh sgrùdaidh bho chomataidh ann an Westminster a thuirt nach bu chòir a' chìs a chur an sàs ann an sgìrean le sluagh nas lugha na 3,000.

"Tha tòrr dhuilgheadasan air a bhith againn mar chomhairle," thuirt an Comh. Alasdair MacFhionghuin.

"Tha e gu tur eadar-dhealaichte bho àiteachan eile. Tha àiteachan iomallach againne, far a bheil daoine a' fuireach ann am bailtean beaga.

"Tha tòrr dhaoine a' fuireach ann an taighean comhairle, 's tha iad air duilgheadasan fhaighinn airson airgid.

"Chan eil Comhairle na Gàidhealtachd ag aontachadh ris a' chìs seo, agus tha sinn ag iarraidh faochaidh.

"Air Ghàidhealtachd, tha tòrr dhaoine ciorramach a' fuireach ann an taighean-comhairle agus 's dòcha gu bheil seòmar-cadail a bharrachd aca nach eil iad ag usadh.

"Ach nuair a tha feadhainn a' tighinn a-steach a choimhead às an dèidh. Agus tha uidheamachd aca anns na seòmraichean a tha sin cuideachd.

"Cha bhiodh e sàbhailte nam biodh iad ann an taigh nach robh seòmraichean mar seo ann.

"Chan eil e cho dona ann am bailtean mar a tha Inbhir Nis, 's Inbhir Pheofharain, 's Port Rìgh, 's an Gearasdan, bailtean mar sin.

"Ach tha bailtean beaga a tha iomallach air Ghàidhealtachd, agus chan eil taighean ann airson mar a chanas iad "downsizing" a dhèanamh," thuirt e.