Slighe an t-Sionnaich Ruaidh

Carragh-cuimhne do Sheumas a' Ghlinne Tha bùird-fhiosrachaidh air an t-slighe gus an sgeulachd a mhìneachadh.

Tha murt ainmeil air a' Ghàidhealtachd san 18mh linn a-nise ga chomharrachadh air slighe bhaidhsagalachd ùr eadar An t-Òban is Baile a' Chaolais.

'S gann gum bi duine san sgìre nach eil eòlach air sgeulachd mhurt na h-Apann ann an 1752, nuair a chaidh Cailean Caimbeul - an Sionnach Ruadh - a mharbhadh.

Chaidh fear de mhuinntir an àite, Seumas Stiùbhart - Seumas a' Ghlinne - fhaighinn ciontach den mhurt is chaidh a chrochadh, ged a tha gu leòr ann fhathast a tha a' creidsinn nach robh gnothach aige ris a' mhurt.

Dh'fhàs an sgeulachd ainmeil air feadh an t-Saoghail tron leabhar Kidnapped aig Raibeart Louis Stevenson san 19mh linn.

Ùidh

'S e an ùidh a tha aig daoine san sgeulachd fhathast a thug air Comhairle na Gàidhealtachd is Comhairle Earra-Ghàidheal is Bhòid a dhol còmhla agus slighe bhaidhsagalachd a chruthachadh.

"Tha an t-slighe seo a' toirt cothrom do dhaoine às an sgìre seo fhèin agus do luchd-turais a dhol air ais ann an tìm mar gum biodh," thuirt fear de chomhairlichean an àite, Brian Murphy.

"Tha sinn an dòchas gun còrd an t-slighe riutha is gun ionnsaich iad barrachd mu eachdraidh na sgìre," thuirt e.

Uile gu lèir tha sia buird-fhiosrachaidh air an t-slighe gus an sgeulachd a mhìneachadh, is Gàidhlig a' nochdadh orra cho math ris a' Bheurla.

'S e fear le eòlas mòr air eachdraidh is cultar Earra-Ghàidheal, Iain MacPhàrlain, a rinn an teacsa sa Ghàidhlig.

"Bha mise a' smaoineacheadh gun robh e math dìreach Gàidhlig na sgìre a chur a-staigh ann bhon 's e a' Ghàidhlig a bh' aig Seumas a' Ghlinne fhèi'," thuirt Iain.

Salm

"Nuair a chaidh e suas an sgafall leugh e an 35mh salm.

"Nuair a leughas tu sin, chì thu nach robh e ciontach idir," thuirt e.

Chan eil na bùird-fhiosrachaidh ge-tà, ag innse cò dha-rìribh a rinn am murt.

"Tha e coltach gu bheil teaghlaichean anns an Apann, ann an Duror agus taobh Loch Èite aig a bheil fios cò rinn am murt seo, ach chan eil fios aig duine cò e bhon cha bhruidhinn na daoine sin gu siorraidh tuillidh," dh'innis Iain.

Tuilleadh mun sgeulachd seo

Chan eil uallach air a' BhBC airson na tha air làraich-lìn eile.

Sgeulachdan aithriseach

  • CofaidhCofaidh is Craic an Glaschu

    Fosglaidh cafaidh ùr ann an Glaschu an ath-mhìos do choimhearsnachd Gàidhlig a' bhaile.


  • DìleasRobo Chù Listen

    Luchd-saidheans ag ràdh gun gabhadh ròbotan a chleachdadh an àite chon-chaorach airson caoraich a bhuachailleachd.


BBC © 2014 Chan eil uallach air a' BhBC airson na th' air làraich-lìn eile.

Gheibhear sealladh nas fheàrr den duilleig seo le sealladair lìn nas ùire agus na duilleagan stoidhle (CSS) air. Ged a chithear susbaint na làraich leis an t-sealladair lìn a th' agaibh, tha sinn a' moladh an dreach as ùire den bhathar-bhog ur sealladair a thoirt a-nuas, no ur duilleagan-stoidhle a chur air ma ghabhas sin dèanamh.