Co-chomhairleachadh mu sheach-rathad Inbhir Nis

Abhainn Nis Thèid an rathad tarsainn Abhainn Nis agus a' Chanàil Chaileannaich

Sgeulachdan co-cheangailte

Thòisich co-chomhairleachadh, a mhaireas seachd seachdainnean, Diciadainn mun sgìre tron tèid seach-rathad ùr Inbhir Nis.

Tha grunn bhliadhnaichean ann bho chaidh bruidhinn an toiseach air seach-rathad a thogail anns a' bhaile agus tha mòran chonnspaid air a bhith a' cuairteachadh nam planaichean.

Tha feadhainn a tha a' strì an aghaidh na slighe a thagh a' Chomhairle a' gearain gun tèid pìos math de dh'àrainneachd phrìseil a' bhaile a chall.

Coiteachadh?

Sheall fiosrachadh, a fhuair am BBC le bhith a' cleachdadh Achd Saorsa an Fhiosrachaidh, gun do dh'fheuch a' chompanaidh thogail as motha air a' Ghàidhealtachd, Tulloch, agus a' chompanaidh-bhùithtean Tesco, ri buaidh a thoirt air co-dhùnadh na Comhairle mun t-slighe a ghabhadh an rathad ùr.

Chaidh Ceannard Chomhairle na Gàidhealtachd, an Comh. Drew Hendry às àicheadh ge-tà, gun robh an dà bhuidhinn air buaidh a thoirt orra.

Ann am brath-naidheachd, thuirt Tulloch nach robh iad air comhairliche neo air oifigear comhairle sam bith a choiteachadh mun chùis agus gur e litir, le am beachdan fhèin, a chur a-steach nuair a chaidh iarraidh orra, uile 's a rinn iad.

"Prìomhachas eile"

Tha am BPA Gàidhealach, Rob Gibson ag ràdh gur ann air rathad an t-Sròim a leasachadh, seach air seach-rathad ann an Inbhir Nis, as fheàrr a ghabhadh an t-airgead seo a chosg.

Tha an A890 air a bhith dùinte grunn thursan anns na beagan bhliadhnaichean a dh'fhalbh às dèidh mhaoimtean-talmhainn.

Thuirt Mgr Gibson gum feum Comhairle na Gàidhealtachd feumalachdan diofar choimhearsnachdan anns an sgìre aca a chothromachadh.

Thuirt Comhairle na Gàidhealtachd gu bheil e na phrìomhachas dhaibh Rathad an Sròim a dhèanamh sàbhailte.

Tha dùil gun tèid na planaichean deireannach airson seach-rathad Inbhir Nis air beulaibh chomhairlichean air 12mh dhen Lùnasdal.

Tuilleadh mun sgeulachd seo

Sgeulachdan co-cheangailte

Sgeulachdan aithriseach

BBC © 2014 Chan eil uallach air a' BhBC airson na th' air làraich-lìn eile.

Gheibhear sealladh nas fheàrr den duilleig seo le sealladair lìn nas ùire agus na duilleagan stoidhle (CSS) air. Ged a chithear susbaint na làraich leis an t-sealladair lìn a th' agaibh, tha sinn a' moladh an dreach as ùire den bhathar-bhog ur sealladair a thoirt a-nuas, no ur duilleagan-stoidhle a chur air ma ghabhas sin dèanamh.