5 Am Màrt 2013 Air ùrachadh aig 10:05

Ìmpidh Bhòrd na Gàidhlig air ceist an referendum

Thuirt an Riaghaltas nach bi a' cheist ga cur sa Ghàidhlig.

Is coltach gun sgrìobh Bòrd na Gàidhlig gu Riaghaltas na h-Alba gus iarraidh orra ceist referendum na neo-eisimeileachd a chur sa Ghàidhlig a thuilleadh air a' Bheurla.

Thuirt an Leas-Phrìomh Mhinistear, Nicola Sturgeon, nach robh adhbhar ann a' cheist a chur ann an Gàidhlig leis gun tuig na Gàidheil a' Bheurla co-dhiù.

A rèir Cheannard Bhòrd na Gàidhlig, Iain Aonghas MacAoidh, 's e cothrom a tha seo sealltainn gu bheil co-ionnanachd spèis ga toirt dhan Ghàidhlig an coimeas ris a' Bheurla.

"Tha sinn a' gabhail ris gu dearbha gu bheil muinntir na Gàidhlig glè thric nas fheàrr anns a' Bheurla na tha daoine gun Ghàidhlig," thuirt Mgr MacAoidh.

"Ach chan e sin a' phuing. 'S e a' phuing a tha an seo, 's e gur e cànan oifigeil a th' ann an Gàidhlig ann an Alba aig an ìre seo, agus bhiodh e math dha-rìribh nan robh sin air aithneachadh le bhith a' faicinn ceist air a cur ann an Gàidhlig agus ann am Beurla.

"Tha e cudromach gum faigh an cànan againn fhìn co-ionnanachd spèis ris a' Bheurla anns a' h-uile suidheachadh a ghabhas," thuirt e.