1 Am Màrt 2013 Air ùrachadh aig 08:55

Wheelhouse ann an Ratharsair

Phàigh an Riaghaltas £9,000 airson cosgaisean na companaidh a th' air an cùmhnant a chall.

Coinnichidh Ministear na h-Àrainneachd, Pòl Wheelhouse, ri muinntir Ratharsair Dihaoine.

Bidh e air thuras ann an Ratharsair là as dèidh do Riaghaltas na h-Alba cur às dhan cho-dhùnadh còirichean seilge a thoirt air falbh bho chroitearan an eilein.

Bha ùpraid ann nuair a thàinig e am bàrr gur i companaidh à Siorrachd Àir a chuir a-steach an tairgse a b' àirde airson nan còirichean a bh' air a bhith an urra ris na croitearan son 18 bliadhna.

Dh'aidich an Riaghaltas Diardaoin gur e mearachd a rinn iad.

'"S e naidheachd mhath dha-rìribh a th' ann," thuirt Cathraiche Comann Chroitearan Ratharsair, John Willie Mac Gill-Ìosa.

"Feumaidh sinn taing a thoirt dha an toiseach co-dhiù, agus taing dhan chuideachadh a fhuair sinn bho na BPA agus muinntir na h-Alba gu lèir.

"Agus an uair sinn bruidhinn ris feuch dè tha fa-near dhaibh, chan ann airson bliadhna, ach a' dol air adhart airson bhliadhnaichean.

"Bidh sinn an dòchas nach tachair an leithid gu bràth tuilleadh a-rithist," thuirt e.