Casg air dì-chroitearachd

Talamh croite Chaidh Achd Ath-leasachaidh na Croitearachd a chur don lagh ann an 2010.

Tha casg ga chur air daoine a th' air an croitean a cheannach bho bhith a' toirt talamh a-mach à croitearachd.

Thuirt Coimisean na Croitearachd gun tàinig orra casg a chur an sàs air sgàth draghan mu Achd Ath-leasachaidh na Croitearachd, far a bheil coltas gu bheil am briathrachas a' ciallachadh nach gabh talamh air croit a chaidh a cheannach leis a' chroitear a thoirt a-mach à croitearachd.

Tha an Coimisean ag ràdh gu bheil iad a' gabhail beachd air buaidh na comhairle laghail a fhuair iad, feuch dè ghabhas dèanamh mu dheidhinn.

Cha ghabh iad ri iarrtasan sam bith airson talamh a dhì-chroitearachd bho shealbhadairean-croite gu an ceann ùine.

Morgaids

Thèid iarrtasan ris a bheileas a' dèiligeadh an-dràsta a chumail gun cho-dhùnadh gus am faigh an Coimisean fuasgladh.

Ri linn reachdais na croitearachd, chan fhaigh croitear cothrom air creideas mur a tèid pìos den chroit - mar as trice am pìos air a bheileas airson taigh a thogail - a dhì-chroitearachd gus an gabh luach ionmhais a chur air, mar urras don bhanca.

Tha an NFU air Ghàidhealtachd ag ràdh gun toir seo buaidh mhòr air croitearan.

"'S e duine a rinn mearachd nuair a bha iad a' sgrìobhadh an lagha," thuirt Labhraiche an NFU, Raibeart Dòmhnallach.

"Cha do studaig iad iar na sealbhadairean-croite nuair a bha iad a' cur an lagha ri chèile.

"Tha e a' dol a bhith uabhasach doirbh do dhaoine can airson morgaids fhaighinn airson taigh a thogail air talamh, no a' feuchainn ri crann-gaoithe a thogail air an talamh.

"Chan fhaighear an t-airgead airson a' chrainn sin, oir cha toireadh banca an t-airgead seachad mur a faighear an talamh air a dhì-chroitearachd.

"Feumaidh iad an lagh atharrachadh. Cha chreid mi gu bheil iad a' dol a chumail orra mar a tha e," thuirt e.

Tuilleadh mun sgeulachd seo

Chan eil uallach air a' BhBC airson na tha air làraich-lìn eile.

Sgeulachdan aithriseach

BBC © 2014 Chan eil uallach air a' BhBC airson na th' air làraich-lìn eile.

Gheibhear sealladh nas fheàrr den duilleig seo le sealladair lìn nas ùire agus na duilleagan stoidhle (CSS) air. Ged a chithear susbaint na làraich leis an t-sealladair lìn a th' agaibh, tha sinn a' moladh an dreach as ùire den bhathar-bhog ur sealladair a thoirt a-nuas, no ur duilleagan-stoidhle a chur air ma ghabhas sin dèanamh.