Fearg mu chòirichean seilge Ratharsair

  • 21 An Gearran 2013
Sealg Image copyright PA
Image caption Tha na croitearan ag iarraidh air an Riaghaltas coimhead as ùr ris a' ghnothach.

Tha fearg air croitearan Ratharsair às dèidh mar a chaidh na còirichean seilge a bh' aca fad 18 bliadhna a thoirt do bhuidhinn a tha còrr agus 200 mìle air falbh.

Tha iad ag ràdh gu bheil an co-dhùnadh a rinn ministearan Riaghaltas na h-Alba, leis a bheil an t-eilean, maslach agus tha iad ag iarraidh orra coimhead as ùr air a' ghnothach.

Chaidh Comann Chroitearan Ratharsair a stèidheachadh a dh'aona-ghnothach airson dèanamh cinnteach gur ann aig muinntir an eilein a bha smachd air còirichean seilge is iasgaich.

Tha iad air a bhith a' pàigheadh màil don Riaghaltas o 1995, agus leasaich iad an gnìomhachas gu mòr anns an ùine sin.

Ach thàinig an cùmhnant gu ceann an-uiridh, leis na còirichean a' dol a-mach gu tairgse, ged a chaidh innse do na croitearan nach robh uallach air ministearan gabhail ris an tabhartas as àirde.

Chaidh na còirichean ge-tà, a thoirt do chompanaidh à Siorrachd Àir, agus oifigich an Riaghaltais ag ràdh gum feumadh iad luach an airgid fhaighinn às a chùm maith muinntir na h-Alba air fad.

Tha na h-eileanaich ag ràdh ge-tà, gun deach an leigeil sìos, agus gu bheil an co-dhùnadh a' dol calg-dhìreach an aghaidh feallsanachd Ath-leasachadh an Fhearainn, a tha ag amas air cumhachd a thoirt do choimhearsnachdan air an gnothaichean fhèin.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile