Leisgeul mu bhàs eusaintich san Eilean Sgitheanach

  • 20 An Gearran 2013

Tha NHS na Gàidhealtachd air leisgeul a thabhainn airson laigsean sa chùram a fhuair seann euslainteach a fhuair bàs aig Ospadal Chuimhneachain MhicFhionnghain san Eilean Sgitheanach.

Chaidh an euslainteach, a bha 92, a thoirt a-steach don ospadal air 31mh am Màrt 2010, agus fhuair e bàs beagan làithean às dèidh sin, ri linn trioblaidean co-cheangailte ri teannachadh na chaolan.

Fhuair rannsachadh gun do dh'fhailich air luchd-cùraim aithneachadh gun robh atharrachadh air tighinn air a shuidheachadh, agus nach do dh'innis iad dha no do a theaghlach na bha a' tachairt.

Thuirt Àrd-Stiùiriche NHS na Gàidhealtchd, Elaine Mead, gun robh i airson leisgeul a thabhainn, gu poblach, às leth Bhòrd na Slàinte, airson nan laigsean sa chùram a thugadh seachad.

Thuirt i gun robh atharrachaidhean air an cur an sàs mar thà feuch piseach a thoirt air gnothaichean.