Sgoil Ghàidhlig Ghlaschu a' fàs

  • 20 An Gearran 2013
Sgoil
Tha dùil ri co-dhiù 80 duine-cloinne ann am P1 san Lùnastal am bliadhna.

Tha Sgoil Ghàidhlig Ghlaschu a' cur feum air seòmraichean-teagaisg a bharrachd, agus faisg air 700 sgoilear a-nis innte.

A thuilleadh air sin, tha dùil gum bi co-dhiù 80 duine-cloinne air P1 san Lùnastal am bliadhna.

Mar sin dheth feumaidh an sgoil barrachd thidsearan fhastadh, agus seòmraichean-teagaisg san sgoil nach deach a chleachdadh thuige seo ath-fhosgladh.

Ghluais an sgoil Ghàidhlig gu togalach seann sgoil Thaobh na Coille ann an 2006, agus tha cuid de sheòmraichean nach deach a chleachdadh on uair sin.

Tha iarrtas air foghlam tro mheadhan na Gàidhlig ann an Glaschu ag èirigh, agus dh'fhoillsich comhairle a' bhaile aig toiseach na mìos gu bheil dùil aca bun-sgoil Ghàidhlig eile fhosgladh air taobh a deas Ghlaschu, a bhios a' fosgladh ann an 2015.

"Tha sinn a' coimhead air na goireasan a th' againn ann an Taobh na Coille, agus an dòchas gum bi a h-uile rud ceart gu leòr a thaobh sin, agus gun urrainn dhuinn seòmar eile a chleachdadh airson nan sgoilearan a tha a' tighinn a-steach don sgoil," thuirt Oifigear Foghlaim Ghàidhlig Comhairle Bhaile Ghlaschu, Jim Whannel.

"Ach tha e follaiseach gum bi sinn feumach air sgoil ùir," thuirt e.