£1m a bharrachd airson calaidhean a chàradh

Stealladh na mara Rinneadh luach suas ri £500,000 de sgrios air calaidhean air Ghàidhealtachd.

Gheibh calaidhean ann an Alba a chaidh a mhilleadh ann an stoirmean o chionn ghoirid £1m a bharrachd de thaic-airgid airson obair-càraidh èiginnich.

Gheibh calaidhean Inbhir Ùige, Baile an Todhair, Lybster agus Port Mo Cholmaig air Ghàidhealtachd, Ceann Phàdraig is Inbhir Lòsaidh san ear-thuath, agus Dùn Bàrr ann an Lodainn, earrainnean den airgead.

Thathas fhathast a' tomhais na chosgas obair-càraidh air cala na Bruaiche.

Thuirt Rùnaire na h-Àrainneachd, Ridseard Lochhead, gun robh Riaghaltas na h-Alba a' cur ris an oidhirp a th' ann gus an damaiste a chàradh.

"Nuair a thadhail mise agus ministearan Albannach eile air calaidhean timcheall na h-Alba às dèidh nan stoirmean a bh' ann o chionn ghoirid, bha an sgrios a rinneadh gu math follaiseach.

"Gidheadh, a thuilleadh air sin, bha e cuideachd follaiseach gun robh coimhearsnachdan nan calaidhean sin gu mòr airson co-obrachadh gus an càradh.

"Air taobh an Riaghaltais dheth, tha sinn air a bhith ag obair gu dlùth còmhla ri ùghdarrasan ionadail agus buidhnean eile gus buile nan stoirmean a mheas gu h-iomlan, agus dh'iarrainn taing a thoirt don a h-uile duine airson an cuid saothrach.

"Thèid an taic-airgid seo mu choinneimh obair-càraidh air ballachan agus cidheachan cudromach, agus cuidichidh e gus na calaidhean a chàradh cho luath 's a ghabhas sin dèanamh," thuirt e.

Tha an taic-airgid ga roinn a-mach fo Achd an Iasgaich 1955.

Tuilleadh mun sgeulachd seo

Chan eil uallach air a' BhBC airson na tha air làraich-lìn eile.

Sgeulachdan aithriseach

What is VOCAB? Deth'ann a VOCAB?

BBC © 2014 Chan eil uallach air a' BhBC airson na th' air làraich-lìn eile.

Gheibhear sealladh nas fheàrr den duilleig seo le sealladair lìn nas ùire agus na duilleagan stoidhle (CSS) air. Ged a chithear susbaint na làraich leis an t-sealladair lìn a th' agaibh, tha sinn a' moladh an dreach as ùire den bhathar-bhog ur sealladair a thoirt a-nuas, no ur duilleagan-stoidhle a chur air ma ghabhas sin dèanamh.