Drabasdair air ais an grèim

  • 7 An Gearran 2013

Fhuair poilis sa Ghàidhealtachd grèim air drabasdair a bha air teicheadh às ionad slàinte inntinn ann an Inbhir Nis.

Chaidh Scott Moireach, 27, fhaighinn ciontach cheana air casaidean drabastachd, is tha e a' faighinn cùram ann an ionad tèarainte aig Ospadal New Craigs ann an Inbhir Nis.

Fhuair e ma sgaoil bhon ionad madainn Diciadain.

Bha Poilis a Chinn a Tuath air innse gu bheil Moireach na chunnart dhan phoball is nach bu chòir do dhuine a dhol faisg air.

Chuir iad Moireach an grèim a-rithist oidhche Chiadain.

Cha do dh'innis NHS na Gàidhealtachd fhathast ciamar a chaidh aig Moireach air teicheadh bhon ospadal sa chiad dol a-mach.