Cosgaidh stoirm na Dùbhlachd £2.5m

  • 17 Am Faoilleach 2013
Caladh Bhaile an Todhair
Bha Caladh Bhaile an Todhair am measg na chaidh a mhilleadh.

Cluinnidh comhairlichean na Gàidhealtachd Diardaoin gun cosg e co-dhiù £2.5m airson am milleadh a rinn stoirm na Dùbhlachd air cladaichean a' chosta an ear a chàradh.

Innsidh oifigearan do Chomataidh Còmhdhail, Àrainneachd agus Seirbheisean Coimhearsnachd na Comhairle mun damaiste a dh'fhulaing cidhichean, ballachan-mara 's eile.

Thèid moladh dha na buill taic airgid èiginneach iarraidh bho Riaghaltas na h-Alba.

Taic riaghaltais

An dèidh dhan stoirm a bhith ann san Dùbhlachd, bha Comhairle na Gàidhealtachd den bheachd gun cosgadh e mu £1m am milleadh air àiteachan leithid calaidhean Bhaile an Todhair agus Phort MoCholmaig a chur ceart.

Ach tha oifigearan a-nis den bheachd gun cosg e còrr is a dhà uidhir - mu £2.5m.

Molaidh na h-oifigearan do chomhairlichean sgrìobhadh gu Rùnaire na h-Àrainneachd, Ridseard Lochhead, ag iarraidh taic riaghaltais.

Tha Caladh Inbhir Lòsaidh san roinn taghaidh aige-san agus chaidh sin a mhilleadh gu dona san stoirm cuideachd.

Tha Comhairle Mhoireibh air taic riaghaltais iarraidh mar thà.

Chan eil fhios le cinnt fhathast dè a tha an obair-càraidh a' dol a chosg air a' cheann thall.