Lùghdachadh ann am prìsean thaighean

  • 10 Am Faoilleach 2013
Soidhnichean
Image caption Bha prìsean sa chumantas air crìonadh beagan ann an 2012 an taca ri 2011.

Thuit prìsean taighean air a' Ghàidhealtachd beagan ann an 2012, a rèir àireamhan ùra.

Thuit cuideachd an àireamh de thaighean a chaidh a reic sa bhliadhna, sìos 1.6% air 2011.

Tha a' chompanaidh HSPC ag ràdh gun do chosg taigh air Ghàidhealtachd £163,012 sa chumantas ann an 2012.

Bha sin sìos 1.8% an taca ri 2011.

Àrdachadh

Thàinig àrdachadh ge-tà, aig deireadh na bliadhna le prìsean sa chumantas san Dùbhlachd aig £182,328.

B'e sin an àireamh mhìosail a b'àirde bhon Iuchar 2008 agus bha na figearan 15% nas àirde na an Dùbhlachd 2011.

A rèir nam figearan bho HSPC tha prìsean taighean air Ghàidhealtachd sa chumantas nas àirde na an còrr de dh'Alba.

Gu nàiseanta tha taigh a' cosg sa chumantas £153,370.

Thuirt HSPC gu bheil tòrr ann a tha airson taighean a cheannach is a reic, ach gu bheil na duilgheadasan a th' ann morgaids fhaighinn a' cur maill air a' mhargaidh.