Dragh mu lùghdachadh uairean-obrach aig companaidh air Ghàidhealtachd

  • 14 An Dùbhlachd 2012
Itealan
Tha a' chompanaidh a' bruidhinn ris an aonadh mun t-slighe air adhart.

Dh'innis companaidh SGL Carbon Fibres a tha a' toirt cosnaidh do chòrr 's 200 duine air a' Bhlàr Dhubh air Taobh Sear Rois gu bheil cunnart ann gum feum iad obraichean a ghearradh leis nach eil iad a' reic uimhir 's a bha iad.

Thuirt luchd-stiùiridh SGL gu bheil iad a' bruidhinn ris an aonadh mu dhòighean air airgead a chùmhnadh.

Tha iad ag ràdh gum b' fheàrr leotha uairean-obrach a lùghdachadh ach gur dòcha gum feum iad àireamh bheag de chosnaidhean a ghearradh.

Thug dàil le cùmhnantan ann an gnìomhachas nan itealan agus cumhachd na gaoithe droch bhuaidh air prothaidean na companaidh.

Bidh SGL cuideachd a' cumail stuth ri luchd-togail chàraichean agus uidheamachd spòrs.

Tha a' chompanaidh na pàirt de bhuidhinn SGL a tha stèidhichte sa Ghearmailt.