Croitean coille gam brosnachadh

  • 16 An t-Samhain 2012
Coille Image copyright Undiscovered Scotland
Image caption Thathas a' faicinn cothrom air coilltean a chleachdadh gus sluagh a ghlèidheadh air an tuath.

Tha iomairt ùr air tòiseachadh airson tuilleadh chroitean coille a chruthachadh air Ghàidhealtachd, sna h-Eileanan, agus ann an Earra-Ghàidheal.

Tha atharrachaidhean a thugadh a-steach le Achd Ath-leasachaidh na Croitearachd (2007), a' ceadachadh gum faodar pìosan beaga de chroitean a chur gu feum airson rudan taobh a-muigh ghnothaichean traidiseanta na croitearachd.

O chionn beagan bhliadhnaichean, thathas air a bhith a' coimhead ri coilltean mar chothrom leigeil le daoine dachaigh agus gnothachas a stèidheachadh ann an sgìrean dùthchail, agus iarrtas airson chroitean air a bhith o chionn fhada gu math nas motha na th' ann de chroitean a tha rim faighinn.

Tha na h-uidhir de chroitean coille air an cruthachadh mar thà ann am Muile.

Tha Com-pàirteachas nan Croitean Coille air a chur air bhonn airson cuideachadh le bhith a' ruith choilltean mar chroitean comharraichte.

Tha Caidreachas Croitearachd na h-Alba, Comann nan Coilltean Coimhearsnachd, agus Urras Taigheadais Choimhearsnachdan Beaga na Gàidhealtachd an sàs.

Tha Iomairt na Gàidhealtachd 's nan Eilean (HIE) cuideachd a' maoineachadh sreath de thachartasan gus barrachd fiosrachaidh a thoirt do dhaoine mun iomairt.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile