Sgoil ùr an Òbain ceum nas fhaisge

  • 26 An Dàmhair 2012
Àrd-Sgoil an Òbain
Image caption Gheall Riaghaltas na h-Alba gum pàigh iadsan dà thrian de chosgais na sgoile ùire.

Dh'aontaich comhairlichean ann an Earra-Ghàidheal gun tèid plana gnìomhachais a dheasachadh a thaobh àrd-sgoil ùr a thogail san Òban.

Rachadh an goireas an àite Àrd-Sgoil an Òbain.

Gheall Riaghaltas na h-Alba mar thà gum pàigh iadsan dà thrian de chosgaisean na pròiseict.

Prionnsabal

Aig coinneamh Diardaoin dh'aontaich a' Chomhairle ann am prionnsabal gum pàigh iadsan an còrr, ma 's e is gun tèid an leasachadh air adhart.

Tha cruaidh fheum air sgoil ùir, a rèir fhir de chomhairlichean Latharna agus Ceann a Tuath an Òbain, Alasdair MacDhùghaill.

"An sgoil a th' ann, tha e a' fàs sean.

"Chan eil gu leòr rùm ann son a' churraicealaim son sàr-mhaitheis a tha a' dol air aghaidh a-niste - feumaidh sinn sgoil mhath," thuirt e.

Làrach

Bidh a' Chomhairle a-niste a' beachdachadh air làrach son na sgoile ùire, cho math ri cò às a thig an t-airgead.

Bha comhairlichean cuideachd a' bruidhinn air àrd-sgoil ùir do Cheann Loch Cille Chiarain.

Tòisichidh co-chomhairleachadh air na planaichean sin air an 17mh den t-Samhain is a' Chomhairle gun sònraichte ag iarraidh bheachdan air làrach son na sgoile.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile