Na Bàigh aig na daoine?

An t-Òb Bidh a' choinneamh ann an Talla an t-Òib Diardaoin an 10mh den Chèitean.

Thèid iarraidh air muinntir Cheann a Deas na Hearadh beachdachadh am bu chòir dhaibh feuchainn ris an fhearann air a bheil iad a' fuireach a cheannach.

Gheibh iad an cothrom aig coinneamh de chomhairle choimhearsnachd na sgìre Diardaoin seo tighinn.

'S e oighreachd mhòr a th'ann an Oighreachd nam Bàgh, a' dol bho dhìreach thaobh a-muigh an Tairbeart sios tron chosta sear agus dhan Taobh Tuath air a' chosta siar.

Tha i cuideachd a' gabhail a-staigh Beàrnaraidh na Hearadh.

'S ann le teaghlach Hitchcock a tha an oighreachd an-drasta.

Cheannaich iad am fearann ann an 1925 nuair a chaochail am Morair Leverhulme.

Trath

Tha a' chomhairle choimhearsnachd ag ràdh gu bheil an gnothach aig ìre gu math trath is an deasbad dìreach a' tòiseachadh.

"Tha Comhairle Coimhearnsachd Cheann a Deas na Hearadh dìreach air tòiseachadh a' cheist a chur riutha fhèin, am biodh buannachd sam bith ann Oighreachd nam Bàgh a cheannach", thuirt fear de bhuill na comhairle, Hamish Mac an Tàilleir.

"Tha sinn dìreach airson a' cheist a chur ris an t-sluagh airson 's gum faigh sinn a-mach aig toiseach-tòiseachaidh barail mhuinntir an àite air", thuirt e.

Bidh riochdairean bho na buidhnean coimhearsnachd a ghabh sealbh air pìosan eile den eilean cheana, Urras Cheann a Tuath na Hearadh agus Urras Taobh Siar na Hearadh, an làthair aig a' choinneimh son comhairle is stiùireadh a thoirt seachad.

Sgeulachdan aithriseach

What is VOCAB? Deth'ann a VOCAB?

BBC © 2014 Chan eil uallach air a' BhBC airson na th' air làraich-lìn eile.

Gheibhear sealladh nas fheàrr den duilleig seo le sealladair lìn nas ùire agus na duilleagan stoidhle (CSS) air. Ged a chithear susbaint na làraich leis an t-sealladair lìn a th' agaibh, tha sinn a' moladh an dreach as ùire den bhathar-bhog ur sealladair a thoirt a-nuas, no ur duilleagan-stoidhle a chur air ma ghabhas sin dèanamh.