Eaglais ùr an Rubha

  • 17 An Giblean 2012
Eaglais ùr an FCC
Chaidh tòiseachadh a' togail airgid airson na h-eaglaise bho chionn còrr is deich bliadhna

Theid eaglais ùr na h-Eaglaise Saoire Leantainniche ann an sgìre an Rubha ann an Leòdhas fhosgladh gu h-oifigeal oidhche Mhàirt.

Chosg eaglais ùr a' Chnuic còrr is £200,000 agus thòisich iomairt gus airgead a thogail air a son ann an 2001 - mu bhliadhna as deidh an sgaraidh anns an Eaglais Shaoir.

Thuirt Calum MacLeòid a tha na eildear anns an eaglais gu bheil iad gu math toilichte an ìre seo a ruighinn.

"Tha sinn air a bhith a' feitheamh bhliadhnaichean airson a bhith anns an àite againn fhìn" thuirt e.

Goireasach

Tha an coithional mar-thà air seirbheisean a chumail anns an togalach ùr aca, agus tha Mgr MacLeòid ag ràdh gu bheil e gu math goireasach.

"Anns a' chiad àite 's e togalach ùr a th' ann - tha e furasta a theasachadh agus a chumail blàth. Tha sin a' dol a ghearradh sìos air na chleachdas sinn de dhealan, agus tha fuaim mhath ann" thuirt e.

'S ann à seann eaglais ann an Glaschu, a dhùnadh bho chionn iomadach bliadhna, a thàinig suidheachain na h-eaglaise.