Rannsachadh poblach gu bhith ann mu losgadair sgudail

  • 28 Am Màrt 2012
Inbhir Ghòrdain Image copyright Undiscovered Scotland
Image caption Tha dragh ann mun bhuaidh air slàinte dhaoine agus turasachd san sgìre

Thèid rannsachadh poblach ionadail a chumail mu phlanaichean gus losgadair sgudail a thogail ann an Inbhir Ghòrdain air taobh sear Rois.

B'e sin co-dhùnadh coinneimh a chaidh a chumail san sgìre oidhche Mhàirt.

Dh'innis Neach-Aithris bho Riaghaltas na h-Alba gun tòisicheadh an rannsachadh air 6mh an t-Ògmhios.

Nochd am plana an toiseach o chionn trì bliadhna, agus tha e air a bhith connspaideach on uair sin.

Leasachadh

Chosgadh an leasachadh £43m.

Chuir Comhairle na Gàidhealtachd na aghaidh an toiseach, ach chuir Riaghaltas na h-Alba às don cho-dhùnadh sin.

On uair sin, dh'òrdaich Cùirt an t-Seisein don Riaghaltas sùil eile a thoirt air a' chùis.

Aig coinneimh oidhche Mhàirt bha riochdairean bhon luchd-leasachaidh Highland Combined Heat and Power, agus bhon bhuidhinn iCARE, a tha a' cur na aghaidh.

Bha mu 200 duine aig a' choinneimh.

Sgudal

Tha an luchd-leasachaidh airson sgudail a losgadh san ionad gus dealan a chruthachadh.

Tha iad a' cumail a-mach gur e dòigh èifeachdach a bhiodh ann air sgudal a chleachdadh gus dachannan dhaoine a theasachadh.

Tha an fheadhainn a tha a' cur na aghaidh ge-tà, draghail mun bhuaidh a dh'fhaodadh a bhith aige air slàinte dhaoine agus air turasachd san sgìre.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile