Sgìrean toirmisgte mu chlàr-gas sa Chuan a Tuath

  • 27 Am Màrt 2012
Clàr-ola Eilginn Image copyright Total
Image caption Chan eil fhios fhathast cò às a tha an gas ag aodion

Chaidh sgìrean toirmisgte a chur an sàs timcheall air clàr-gas sa chuan a tuath a th' air a bhith ag aodion gas gu dona bho Dhidòmhnaich.

Tha na Maoir-chladaich air innse do luingeas cumail co-dhiù dà mhìle air falbh bho Chlàr Eilginn, agus feumaidh itealain cumail trì mìle air falbh.

Tha sgoth de ghas a' cuairteachadh a' chlàir a tha mu 150 mìle an ear air Obar Dheathain, agus a th' air a ruith leis a' chompanaidh Total.

Chaidh an luchd-obrach a thoirt far a' chlàir Diluain, agus thugadh 85 de luchd-obrach nach eil deatamach far an dàrna clàir agus aonad-tollaidh a tha faisg air làimh.

Iomairt shàbhailteachd

'S iad sin Clàr Shearwater, agus aonad-tollaidh Hans Deul, a tha le Shell, agus a tha stèidhichte mu cheithir mìle air falbh.

Thuirt Shell gur e "iomairt shàbhailteachd" a bh' ann.

Thuirt Total gun robh an suidheachadh seasmhach, ach nach deach aca fhathast air aithneachadh cò às a tha an gas ag aodion.

Tha sgleò anns a bheil eadar dhà agus 23 tunna de ghas sùmhlach (gas condensate), sia mìle mara de dh'fhaid, na laighe air an uisge san sgìre.

Tha Total air Plana Èiginneach Truailleadh Ola a chur an gnìomh.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile