Airgead rathad an t-Sròim

  • 7 Am Màrt 2012
Aiseag an t-Sròim Image copyright Other
Image caption Tha aiseag air a bhith a' frithealadh na slighe bho mheadhan an Fhaoillich

Cha tug Ministear na Còmhdhail, Cè Mac Ille Dhuinn, gealltanas sam bith seachad gun cuireadh Riaghaltas na h-Alba airgead ri fuasgladh maireannach fhaighinn do shuidheachadh seach-rathad an t-Sròim.

Tha an rathad air a bhith dùinte son barrachd na dà mhios as dèidh maoim-slèibhe beagan làithean ron Nollaig.

Thòisich aiseag chàraichean a' frithealadh na slighe air an 16mh den Fhaoilleach.

Bha an aiseag dheth fad grunn làithean an t-seachdainn a chaidh, as dèidh dhith bualadh anns a' chidhe.

Bhris i a-rithist madainn Dimàirt as dèidh dhith tilleadh chun na seirbheis.

"Dleasdanas na Comhairle"

Bha Ministear na Còmhdhail, Cè Mac Ille Dhuinn anns an sgìre Dimàirt gus sùil a thoirt air an t-suidheachadh - ach cha robh e airson gealltanas a thoirt seachad mun taic a bheireadh an Riaghaltas do Chomhairle na Gàidhealtachd.

Thuirt e gur ann an urra ri Comhairle na Gàidhealtachd a bha e an rathad a leasachadh agus a chumail fosgailte.

Thuirt e, ged a tha e a' tuigsinn gu bheil gainnead airgid air a' Chomhairle, gun deach gearradh cuideachd air an ionmhas a th' aig Riaghaltas na h-Alba.

Tha comhairliche na sgìre Audrey Nic na Ceardaich ag ràdh gu bheil a' Chomhairle dòchasach cead fhaighinn bho Network Rail a leigeadh leotha an loidhne rèile a chleachdadh mar rathad.

Tha dùil ri fios mun aonta sin, thuirt i, an t-seachdainn-sa fhèin.