Селаните зборуваат за исчезнати риби

СЛУШАЈТЕ ГО ПРИЛОГОТ

Наспроти нив, пред само неколку дена, министерот за животна средина на Република Македонија Џелил Бајрами му ја врачи на „Фени“ интегрираната дозвола за контрола на загадувањето.

Чистотата на Црна се проверува пет пати во годината, а последните мостри се земени во декември минатата година.

Трајче Ризов од републичкиот Завод за здравствена заштита вели дека хемиските анализи покажале трета и четврта класа, а бактериолошките прва и втора класа на водата, што говори дека истата не е штетна за рекреација.

Сеќавања

Но повозрасните жители од тиквешкото село Возарци каде реката тече ја споредуваат нејзината чистота со времето кога тие биле деца и се капеле во неа, па еве што велат:

-„Порано тука беше целото капење, не се одеше на езерото воопшто."

-„Порано беше добра реката, ама сега е загадена многу од Фени."

-„Каде, нема шанса да се бањаат децата. Тоа е црвенило, ќе добијат шуга, шуга ќе ги фати, што се`нема тука."

Возарчани ја избегнуваат Црна за рекреација, но не и за наводнување на површините посадени со земјоделски производи кои се продаваат на пазарите, што го потврдуваат и самите жители од селото:

-„Да, да, има, надолу се наводнува со моторчиња, со агрегати...се наводнува и грозје и патлиџан и пипер, кој што посадил, лук....Каква е водата што се гледа мора да има нешто штетно, тоа мора да се провери", велат жители од Возарци.

Луѓето тврдат дека откако отпадните води од „Фени индустри“ се влеваат во Црна Река, сменет е вкусот на рибите кои живеат овде, а спортскиот риболовец Трајко Колевски вели дека одредени видови риби се сосема исчезнати:

-„Имаше клен, јагула имаше, јагулата исчезна, сега има само мренка, а има понекогаш и мирис, рибата кога е во тињата, во матната вода не е вкусна".

Екологистите апелираат „Фени“ да постави филтер за прочистување на отпадните води кои се влеваат во Црна Река:

-„Има ’Фени’ филтер. Филтерот е под ’Фени’ под мостот, а дали работи, дали е исправен, не знам."

Неутрализација

Наспроти ваквите реагирања на Возарчани, Миска Костова, главен инженер во погонот водостопанство во „Фени индустри“ тврди дека тие вршат постојана неутрализација на отпадните води кои не ја загадуваат животната средина:

-„Кај отпадните води кои доаѓаат од погоните во ’Фени’, ако е потребно се врши само дел на неутрализација на водите. Квалитетот на водите ги задоволува сите параметри кои што ги бара Заводот за води на Република Македонија како на отровни, така на токсични и на микроелементи во водата", вели Костова.

Пред само неколку дена, „Фени индустри“ стана првата компанија во Македонија која доби интегрирана еколошка дозвола што е дел од системот на Европската унија за контрола на загадувањето, како и сертификат за вграден стандард ИСО 9001.