Дүйнөлүк жаңылыктар

Италия өкмөтү өлкөдөгү баардык министрлердин жеке финансылык абалы тууралуу маалыматтарды интернет сайтына жарыялоодо. Бул кадам жаңы администрациянын иш-аракеттерин коомчулукка ачык кармоого багытталган.

Британияда жогорку кызматтагы өкмөт өкүлү бул өлкөгө келип жашаган мигранттар жана улуттук азчылыктар жергиликтүү коомчулук менен жуурулушуп жашашы үчүн англис тилин жана Британ салттарын жакшы билиши керек деп билдирүүдө.

Абхазия президенти Александр Анквабды коштогон унаалар Сухумиге бараткан жолдо жардыргыч затка тушугуп, жансакчыларынын бири мерт болду. Коопсуздук кызматкерлердин дагы бири оор абалда ооруканага жеткирилген.

Афганистандагы АКШ күчтөрүнүн башчысы, генерал Жон Аллен коалициялык күчтөрдүн аскерлери Ыйык Куранды өрттөп жоготкон деген маалыматтарга байланыштуу кечирим сурады. Бул окуялар текшерилээрин билдирди.

Германиянын оппозициячыл Социал-демократтар жана жашылдар партиялары президентикке талапкер катары укук коргоочу Иоахим Гаукту көрсөттү. Өлкөнүн канцлери Ангела Меркель бул талапкерди колдой турганын айтты.

Японияда соода-сатык дефицити январь айында рекорддук деңгээлге төмөн түшүп, импорттун көлөмү экспорттон 19 миллиард долларга ашып кетти. Бир катар жагдайлар өлкөдөгү экспорттун көрсөткүчүн былтыркыга салыштырмалуу 9.3%га төмөн болушуна алып келген.

Түштүк Корея Түндүк Корея менен чектешкен аралдарда аскерий машыгуу өткөрдү. Иш-чарага байланыштуу Түндүк Корея эскертүүлөрдү жолдогон, ал эми батыш аралдарында жашаган Түштүк Корея тургундарына аймакта чыга турууга кеңеш берилген.

Германиянын президенти Кристиан Вульф отставкага кетээрин жар салды. Прокуратура соңку айларда коррупциялык ишке аралашкандан чыккан чуудан улам парламентке президенттин кол тийбестик укугун алып салуу боюнча расмий кайрылган эле.

Австралиянын окмуштуулары изилдөө жүргүзүп, Европа менен АКШдагы окуучулар жетишүү көрсөткүчү боюнча өзү теңдүү азиянын айрым аймактарындагы окуучулардан үч жылга артта экенин айтып чыгышты.