Newyddion

Mae tri chwarter poblogaeth y DU yn gwylio neu’n gwrando ar wasanaeth newyddion y BBC mewn rhyw ffordd neu’i gilydd. Rydym yn arbennig o falch o’n newyddiadurwyr praff a threiddgar, o John Humphrys ar raglen Today i Jeremy Paxman ar Newsnight a rhaglenni ymchwiliol fel Donal MacIntyre ar Radio 5 Live.

Yn 2008/09, fe wnaethom ddarlledu sawl stori bwysig yn ystod argyfwng y banciau cyn pawb arall, a defnyddio ein rhaglenni materion cyfoes i drafod effaith yr argyfwng yn fanylach ar ein gwylwyr a’n gwrandawyr.

Gwefannau cysylltiedig:
BBC News

Materion cyfoes

Yn ogystal â phennu’r agenda newyddion, rydym yn chwarae rhan bwysig wrth helpu pobl ledled y DU i ddeall sut mae’r newyddion yn effeithio ar eu bywydau bob dydd. Roedd ein rhaglenni materion cyfoes yn edrych y tu hwnt i’r newyddion, gan drin a thrafod materion fel amodau yng ngweithdai strydoedd cefn India lle mae rhai o’n dillad yn cael eu gwneud yn Blood, Sweat And T-Shirts ar BBC Three.

Gwefannau cysylltiedig:
BBC Business News

Addysg a dysgu

Mae pecyn dysgu’r BBC yn amrywio o gynorthwyo plant ysgol sy’n sefyll arholiadau TGAU i raglenni dogfen rhyfeddol, llawn gwybodaeth, fel Baroque a The Lost Land of the Jaguar, sy’n ehangu gorwelion pobl ac yn magu’r awydd i wybod mwy. Rydym yn manteisio i’r eithaf ar botensial anferthol y we, o becynnau adolygu ar-lein Bitesize a gwybodaeth gefndir ynghylch etholiadau hollbwysig America 2008, i bodlediadau rhaglen Melvyn Bragg ar hanes syniadau, In Our Time, ar Radio 4.

Gwefannau cysylltiedig:
BBC Bitesize | BBC Learning

Comedi

Mae rhaglenni adloniant gwreiddiol ac arloesol wrth wraidd ein gwasanaeth. Er enghraifft, does neb yn buddsoddi cymaint â’r BBC mewn comedi gwreiddiol Prydeinig, a dyma un o’r meysydd lle mae ffi’r drwydded yn talu ar ei ganfed. Dim ond trwy fentro gyda doniau newydd y daeth hi’n bosibl inni gynhyrchu cyfresi cwlt llwyddiannus fel Little Britain, Gavin and Stacey a Beautiful People.

Gwefannau cysylltiedig:
BBC Comedy

Drama

I lawer o bobl y byd, mae’r BBC yn gyfystyr â dramâu heb eu hail. Roedd dramâu newydd 2008/09 yn cynnwys Little Dorrit, The Diary Of Anne Frank, The No.1 Ladies’ Detective Agency, The House Of Saddam a Margaret Thatcher: The Long Walk To Finchley. Roedd yr addasiad teledu o nofelau Henning Mankell am Wallander, y ditectif o Sweden, yn llwyddiant ysgubol a enillodd wobrau lu, felly hefyd Ashes To Ashes, y dilyniant i Life On Mars.

Gwefannau cysylltiedig:
BBC Drama

Cerddoriaeth

Nid yw’r un darlledwr arall yn cynnig cymaint o amrywiaeth o gerddoriaeth fyw ac wedi’i recordio, o ganu gwlad i glasurol, roc i R&B. Rydyn ni’n darlledu oriau dirifedi o gerddoriaeth fyw yn 2008/2009, gan gynnwys 600 o gyngherddau cyflawn ar Radio 3 a sesiynau byw o Maida Vale gyda chantorion fel Adele a Paul Weller.

Gwefannau cysylltiedig:
BBC Music | BBC Blast | BBC Proms

Newyddion a gwybodaeth leol

Un o gryfderau mwyaf y BBC yw’r rhwydwaith newyddion lleol a rhanbarthol, sy’n bosibl diolch i sicrwydd a sadrwydd ffi’r drwydded. Yn ogystal ag arlwy BBC Cymru, BBC Scotland a BBC Alba ar y teledu, mae gennym dros 40 o orsafoedd radio sy’n darlledu ledled y DU. Maent oll yn gwneud cyfraniad unigryw i’w bröydd, gan gynnig newyddion, gwybodaeth a’r cyfle i drin a thrafod pynciau a phryderon lleol.

Gwefannau cysylltiedig:
BBC Local

Sylw byd-eang

Mae’r BBC yn enwog ledled y byd am gynnig newyddion a dadansoddiadau annibynnol a gwrthrychol. Rydym yn darlledu’n fyd-eang, yn genedlaethol, rhanbarthol a lleol, gan gyflwyno’r byd i’r DU a’r DU i’r byd. Yn 2008/09, cyflwynodd ein gohebwyr tramor straeon pwysig fel ymosodiadau terfysgol Mumbai, y gwrthdaro rhwng Israel a Gaza, ac etholiadau arlywyddol yr Unol Daleithiau.

Gwefannau cysylltiedig:
BBC World News

BBC World Service

Mae’r World Service yn cael ei ariannu’n uniongyrchol gan grant gan y Swyddfa Dramor, nid gan ffi’r drwydded. Ansawdd, annibyniaeth barn a chyrhaeddiad byd-eang y World Service yw un o’r prif resymau pam mai’r BBC yw o ddarlledwyr uchaf eu parch y byd. Mae bellach yn darlledu newyddion mewn 32 o ieithoedd. Cafodd y gwasanaeth Arabeg newydd ei lansio yn 2008, a hwn oedd rhan gyntaf gwasanaeth y World Service i weithredu’n llawn ar deledu, radio ac ar-lein.

Gwefannau cysylltiedig:
BBC World Service

BBC iPlayer

Mae’r iPlayer yn torri tir newydd wrth chwyldroi’r modd mae pobl yn rhyngweithio â’r BBC, ac mae’n denu 400,000 o ddefnyddwyr y dydd o dan y slogan ‘making the unmissable unmissable’. Yn 2008, fe wnaethom lansio fersiwn CBBC o iPlayer, sy’n cynnig cyfle hwylus a diogel i blant a phobl ifanc fwynhau eu hoff sioeau eto.

Gwefannau cysylltiedig:
CBBC iPlayer | BBC iPlayer

Technoleg newydd

Datblygu technolegau newydd yw un o’n ffyrdd pwysicaf o fuddsoddi ffi’r drwydded ar gyfer y dyfodol, fel bod ein cynulleidfaoedd yn gallu parhau i fwynhau’r profiad gorau y gall darlledu ei gynnig. Mae teledu manylder uwch (HD) yn enghraifft dda. Mae teledu HD yn chwyldroi’r ffordd yr ydym yn gwylio’r teledu, ac rydym yn cynhyrchu mwy a mwy o raglenni y gellir eu gwylio fel hyn – o Wimbledon i Wallander, Strictly Come Dancing i Nature’s Great Events.

Gwefannau cysylltiedig:
BBC HD

Plant

Y BBC yw’r unig fuddsoddwr sylweddol mewn rhaglenni newydd a gwreiddiol i blant. Yn 2008/2009 fe wnaethom gomisiynu 60 awr o ddramâu newydd i CBBC a CBeebies gan gynnwys The Sarah Jane Adventures ac In The Night Garden, un o blith nifer o raglenni newydd a gynhyrchwyd gan gwmnïau annibynnol i ni y llynedd.

Gwefannau cysylltiedig:
CBeebies | CBBC

Chwaraeon

Y BBC yw un o’r darlledwyr chwaraeon mwyaf proffesiynol ac uchel eu parch yn y byd. Yn 2008 gwyliodd bron i 13 miliwn rownd derfynol cystadleuaeth y dynion yn Wimbledon, a dilynodd mwy na 42 miliwn ein darllediadau o Gemau Olympaidd Beijing. Yn y cyfamser, mae Radio 5 Live yn parhau i ddarlledu’r gemau criced yn ogystal â phencampwriaethau bocsio’r byd, rasio modur a thenis agored UDA.

Gwefannau cysylltiedig:
BBC Sport