BBC navigation

Muamba ya yi minti 78 'kusan a mace' —Likita

An sabunta: 21 ga Maris, 2012 - An wallafa a 18:03 GMT
Fabrice Muamba

Dan wasan Bolton, Fabrice Muamba, kafin ciwon zuciya ya kama shi

Likitan kungiyar kwallon kafa ta Bolton Wanderers, Jonathan Tobin, ya ce Fabrice Muamba ya shafe minti saba'in da takwas 'kusan a mace' bayan ya yanke jiki ya fadi a filin wasa.

Likitoci dai sun ce lokaci bai yi ba tukunna da za a iya hasashen ko Muamba zai iya ci gaba da buga kwallo ko a'a.

Sai dai Dokta Tobin ya ce ya yi mamakin saukin da dan wasan ya samu ya zuwa yanzu.

"Ina farin cikin tabbatar da cewa alamun samun sauki sun ci gaba da bayyana; na je na ga Fabrice—da na shiga sai ya ce min 'Yaya aka yi ne dokta?' Na tambaye shi 'Yaya jiki?' Sai ya ce 'Da sauki'. Ya kuma tambaye ni abin da ya faru, na yi masa bayani", in ji Dokta Tobin.

A halin da ake ciki kuma, ranar Asabar kungiyar ta Bolton Wanderers za ta koma bakin daga bayan da iyalan Muamba suka shaidawa kungiyar cewa za su so ta ci gaba da buga wasanninta.

Don haka ne ma kungiyar za ta buga wasanta da Blackburn Rovers ranar kamar yadda aka shirya da misalin uku na rana agogon GMT.

Kungiyar ta Bolton ta kuma tabbatar da cewa za ta sake buga wasanta na daf da na kusa da na karshe a Gasar Cin Kofin FA da Tottenham Hotspur.

Kari a kan wannan labari

Maudu'o'i masu alaka

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.