BBC navigation

Boko Haram: An kashe mutane 12 a Borno

An sabunta: 30 ga Disamba, 2013 - An wallafa a 13:51 GMT

Jihar Borno na karkashin dokar ta baci

'Yan bindiga da ake zargin 'yan Boko Haram ne sun kashe mutane 12 tare da raunata wasu da dama a wani hari da su ka kaddamar a kauyuka biyu dake jihar Borno dake arewacin Nigeria.

'Yan Boko Haram din a kan babura sun kai hari a kan masu liyafar biki a kauyen Tashan-Alade a daren ranar Asabar sannan kuma a ranar Lahadi su ka kai hari a kauyen Kwajaffa.

Wanda ya shaida lamarin ya bayyanawa kamfanin dillancin labarai na Reuters cewar 'yan Boko Haram a kan babura sun kaddamar da hare-hare a kan kauyukan kafin su kama gabansu.

A tsakiyar wannan shekarar, Shugaba Goodluck Jonathan ya kaddamar da dokar ta baci a jihohin arewa maso gabas, abinda ya tilastawa 'yan Boko Haram ficewa daga birnin Maiduguri su ka koma kan tsaunukan dake kan iyaka da kasar Kamaru.

A makon da ya gabata ne shugaban kungiyar Boko Haram, Abubakar Shekau a wani bidiyo yace kungiyarsu ce ta kadammar da hari a kan barikin sojoji dake garin Bama a jihar Borno.

Kawo yanzu dai hukumomin tsaro a Najeriyar ba su ce komai ba a kan faruwar al'amarin.

Kari a kan wannan labari

Maudu'o'i masu alaka

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.