BBC navigation

Shugaban Cyprus ya kare yarjejeniyar ceton kasar

An sabunta: 25 ga Maris, 2013 - An wallafa a 05:47 GMT

An cimma yarjejeniyar ba wa Cyprus bashin 10b Euro

Shugaban Cyprus, Nicos Anastasiades, ya kare yarjejeniyar cetar bankunan kasar daga rugujewa.

Mr Anastasiades, wanda ya sasanta cimma yarjejeniyar tare da babban bankin Turai, da kungiyar tarayyar Turai da kuma hukumar bayar da lamuni ta duniya -IMF a Brussels, ya fada a cikin wani jawabi ta Talabijin cewar yarjejeniyar nada zafi, amma kuma ita ce mafi kyau a karkashin halin da kasar ta samu kanta.

Yarjejeniyar ta kare masu kudin ajiya kalilan, to amma masu kudin ajiyar da suka kai euro fiye da dubu dari daya, da wayansu yan Rasha, na fuskantar asara babba.

Shugaban kasar ya ce a gobe za a takaita kudin da mutane za su iya fitarwa daga bankuna, bayan sun sake budewa a karon farko a cikin fiye da mako guda.

To amma ya ce za a sassata matakin sannu a hankali. Tun farko Shugabar Gwamnatin Jamus, Angela Merkel, ta yi marhabin da yarjejeniyar, tana mai cewar an raba asarar ceton daidai wa daida.

Kari a kan wannan labari

Maudu'o'i masu alaka

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.