BBC navigation

Congo: 'Yan tawayen M23 sun tsagaita wuta

An sabunta: 8 ga Janairu, 2013 - An wallafa a 16:33 GMT
Mayakan M23

'Yan tawayen sun karbe garin Goma a watan Nuwambar bara, amma daga bisani suka janye

'Yan tawayen M23 sun tsagaita wuta don kashin kansu, gabannin zagaye na biyu na tattaunawar zaman lafiya da gwamnatin demokradiyyar Congo.

Sun bayyana hakan ne a wani taron manema labarai a Kampala, suna masu fatan cewa ita ma gwamnati da ta bi sahunsu.

Yunkurin tattaunawar da aka yi a watan jiya na kawo karshen tada kayar bayan na tsawon watanni tara bai yi nasara ba.

Kimanin mutane 800,000 ne suka rasa matsugunansu, tun lokacin da 'yan tawayen suka fara yaki da gwamnati a watan Mayun shekarar 2012.

"Muna goyon bayan zaman lafiya, kuma a yau mun sanar da tsagaita wuta." Kamfanin dillacin labarai na Reuters ya ambato kakakin kungiyar ta M23, Francios Rucogoza na cewa a Kampala.

"Koda kuwa gwamnati ta ki amince wa ta tsagaita wuta, mun amince za mu cigaba da tattaunawa." Inji Kakakin.

'Yan tawayen dai na zargin shugaba Joseph Kabila da rashin aiwatar da yarjejeniyar baya, wadda a karkashinta za a shigar da su cikin sojin kasar.

Tun asali, mutumin da kotun hukunta manyan laifuka ta duniya ke nema ruwa a jallo, Bosco Ntaganda ne ke jagorantar kungiyar M23, kuma sun samu nasarori a bara.

Maudu'o'i masu alaka

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.