Kotu a China ta daure tsohon babban jami'in 'yan sanda

Wang Lijun

Wata Kotu da ke birnin Chengdu ta yanke wa tsohon babban jami'in 'yan sandan China hukuncin daurin shekaru goma sha biyar a gidan yari saboda hannun da yake da shi a wata tabargazar siyasa.

An tuhumi Wang Lijun ne da laifukan da suka hada da sauya sheka, da amfani da matsayinsa ba bisa ka'ida ba, da kuma neman yin rufa-rufa ga kisan wani dan kasuwa dan Birtaniya.

Ya amsa laifukan da aka tuhume shi da aikatawa.

A cikin watan Fabrairu ya nemi mafaka a ofishin jakadancin Amurka, ya kuma yi zargin cewa Gu Kailai, uwargidan fitaccen dan siyasar nan na China, Bo Xilai ta kashe abokin huldar cinikin ta ne a rikicin da suka yi game da kudi.