BBC navigation

Shugaba Karzai ya soki dakarun NATO

An sabunta: 16 ga Satumba, 2012 - An wallafa a 19:16 GMT

Hamid Karzai, shugaban Afghanistan

Shugaban Afghanistan, Hamid Karzai yayi matukar Allah wadai da kisan da aka yi ma wasu mata takwas, a wani hari da NATO ta kai ta sama.

Sanarwa da shugaba Hamid Karzai ya fitar akan kisan matan takwas dai na cike da kalmomi masu nauyin gaske na yin Allah wadai.

Shugaba Karzai ya kuma ce zai aike da jami'ai zuwa lardin da lamarin ya faru domin a soma binciken tabbatar da hakikanin abinda ya auku.

Jami'an lardin Laghman sun ce wasu mata ne na yankin suka fita sassafe zuwa kan wasu tsaunuka domin kalato itacen girki. Kwatsam sai hari daga sama yayi ajalinsu.

Sai dai kuma kakakin dakarun kasashen waje da NATO ke jagoranta yace, hakika sun kai hari da ya nufi masu tada kayar baya, kuma an kashe da dama daga cikinsu.

Amma kakakin na dakarun NATO ya kuma ce, hakika suna sa ne da cewa, harin ya shafi fararen hula, kuma ya mika ta'aziyarsa ga iyalan wadanda lamarin ya shafa.

Batun kai hari dake shafar fararen hula A Afghanistan yana da sarkakiya sosai a Afghanistan, kuma batu ne dake ingiza kyamar dakarun kasashen waje dake kasar.

Wannan hari na faruwa ne kuma bayan 'yan sandan Afghanistan sun bada rahoton cewa, wani jami'in tsaron kasar ya kashe dakarun NATO hudu.

Maudu'o'i masu alaka

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.