India ta baiwa manyan shaguna dama su ci kasuwa

Gwamnatin India ta ki janye karin farashin mai

Majalisar zartarwa ta India ta yanke shawarar kyale manyan shagunan sayar da kayayyaki su bude rassa a kasar, inda a kan samu biliyoyin daloli a harkar saye da sayar da kaya dai-dai.

Ga alama kuma wannan wani yunkuri ne na yin kaimi ga tattalin arzikin kasar wanda ke tangal-tangal.

Wannan mataki dai zai bayar da dama ga manyan shagunan sayar da kayayyaki irin su Wal-Mart da Tesco su hada gwiwa da kamfanoni na gida don rika sayar da kaya kai-tsaye ga mabukata a India.

An fara gabatar da wannan shawara ce shekara guda da ta wuce, amma gwamnatin kasar a karkashin jagorancin jam'iyyar Congress ta sauya tunani bayan jam'iyyun da ke hadaka sun nuna adawa.

Sanarwar dai ta zo ne a daidai lokacin da gwamnatin ta yi kunnen uwar shegu da kiraye-kirayen da ake yi mata ta sauya shawara dangane da karin kudin man fetur da ta yi kwanan nan.