BBC navigation

UNICEF: Yawan mace-macen yara ya ragu a duniya

An sabunta: 13 ga Satumba, 2012 - An wallafa a 10:43 GMT
Yara manyan gobe

Yara manyan gobe

Yawan yaran dake mutuwa kafin su cika shekaru biyar a duniya sun yi matukar raguwa a shekaru 20 da suka gabata, a cewar asusun tallafawa yara na Majalisar Dinkin Duniya, UNICEF.

Kimanin yara 'yan kasa da shekaru biyar, sama da miliyan shida ne suka mutu a shekarar 2011, idan aka kwatanta da mutuwar yara miliyan 12 a shekarar 1990.

Kuma kusan yara 'yan kasa da shekaru biyar dubu 19 ne, suka mutu kullum a shekarar ta 2011.

Asusun na UNICEF ya ce kasashe matalauta na samun kudi, shi yasa aka samu raguwar mace-macen yaran.

Yayin da samun karbuwar shayar da yara nonon uwa da kuma alluran rigakafin cututtuka suma sun taimaka wajen raguwar da aka samu.

Haka kuma matukar raguwar mace-macen yaran an fi samunsa a kasashen da suka samu tallafi daga waje.

Daraktan UNICEF a Birtaniya, David Bull ya ce " Idan ka kalli kasashen da suka samu nasara kamar jamhuriyar demokradiyyar Lao da Timor da kuma Liberia su ne kasashe uku na gaba-gaba, kuma samun agaji ya taimaka matuka."

Yunkurin rage cututtuka masu yaduwa kamar bakon dauro, ya rage mace-macen dake da dangantaka da hakan a fadin duniya.

Alkaluman sun ragu daga dubu 500 a shekarar 2000 zuwa dubu dari a shekarar 2011.

Maudu'o'i masu alaka

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.