BBC navigation

Da kamar wuya a shawo kan rikicin Syria - Brahimi

An sabunta: 3 ga Satumba, 2012 - An wallafa a 11:12 GMT
Sabon wakilin Majalisar Dinkin Duniya a kasar Syria Lakhdar Brahimi

Sabon wakilin Majalisar Dinkin Duniya a kasar Syria Lakhdar Brahimi

Sabon wakilin musamman na Majalisar Dinkin Duniya a kasar Syria, Lakhdar Brahimi, ya ce aikin da ke gabansa tamkar wani abu ne mai kamar da wuya.

Yayin da ya ke magana da BBC bayan ya karbi mukamin na sa, Mr Brahimi ya yi amannar jin tsoron nauyin da ya rataya a wuyansa, yana mai cewa kasashen waje ba sa tabuka wani abin ku zo ku gani wajen hana yawan mutuwar da 'yan kasar Syria ke yi.

Kofi Annan, wanda ya gabaci Mr Brahimi, ya sauka daga mukaminsa a cikin watan Agusta, bayan da rikicin da ke tsakanin dakarun gwamnati da na 'yan tawaye ya kara ta'azzara, wanda kuma ya kasance dukkannin bangarorin biyu suka nuna turjiya game da shirinsa na wanzar da zaman lafiya.

Mr Brahimin dai ya nuna karayarsa game da aikin da ke gabansa na tunkarar rikicin kasar ta Syria.

'' Ina mai matukar tsoron girma da nauyin aikin da ke gaba na, mutane suna ta fadin cewa mutane na mutuwa, me za ka yi domin taimakawa? Kuma a gaskiya ba ma yin wani abin ku zo ku gani, ko wannan ma ai wani babban abu ne, dole ne a ji tsoron lamarin."

Mutane da dama ne musaamman fararen hula a Syriyar ke ci gaba da rasa rayukan su, sakamakon kara kazancewar da rikicikin ke yi tsakanin dakarun gwamnati da na 'yan tawaye a kasar.

Kari a kan wannan labari

Maudu'o'i masu alaka

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.