BBC navigation

Wakiliyar Assad ta je China don tattaunawa

An sabunta: 14 ga Agusta, 2012 - An wallafa a 06:10 GMT

Buthaina Shaaban

Wata wakiliya ta musamman ga shugaba Basharul Assad na ganawa da ministan harkokin wajen China, Yang Jiechi, a yunkurin da gwamnatin Syria ke yi na kara samun goyon baya daga kasashen waje kan yadda take tunkarar rikicin kasar.

A baya dai China, tare da Rasha sun dakile yunkurin kasashen duniya na kakabawa kasar Syria takunkumi.

Tun da aka fara yaki a Syria Beijing ta kafe cewa ba za ta goyi bayan yunkurin kawar da shugaba Assad ba.

Don haka ziyarar da Buthaina ke yi a Beijing wani bangare ne a yunkurin da Assad ke yi wajen ganin kawayensa ba su juya masa baya a halin matsin da yake ciki ba.

Jami'an gwamnatin China sun ce watakila su gayyaci 'yan tawaye su ma domin tattauna a kan rikicin kasar.

Hakan na faruwa ne a lokacin da dakarun 'yan tawayen Syria suka ce sun harbo jirgin saman yaki mallakin gwamnatin kasar kusa da kan iyakarta da Iraq.

Wadansu hotunan bidiyo da aka sa a Intanet sun nuna jirgin ya kama da wuta yayin ake jin karar harbin bindigogi.

Gidan talabijin mallakin gwamnatin Syria ya tabbatar da faduwar jirgin, sai dai ya kara da cewa ya fadi ne sakamakon tangardar wata na'urarsa.

Idan dai ikirarin da 'yan tawayen suka yi na harbo jirgin saman yaki na gwamnatin ya tabbata, za a iya cewa hakan wata mahangurba ce ga shugaba Assad.

Kari a kan wannan labari

Maudu'o'i masu alaka

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.