BBC navigation

Japan ta ja kunnen shugaban Korea ta Kudu

An sabunta: 10 ga Agusta, 2012 - An wallafa a 15:13 GMT
Tsibiran Dokdo

Tsibiran Dokdo

Japan ta yi gargadin cewa ziyarar da Shugaba Lee Myung-bak na Korea ta Kudu ya kai tsibiran Dokdo za ta yi illa ga dangantakar da ke tsakanin kasashen biyu.

Shugaba Lee ne dai shugaban kasar Korea ta Kudu na farko da ya kai ziyara zuwa tsibiran—wadanda a Japan aka sansu da suna Takeshima—wadnda ake takaddama a kansu.

Ziyarar ta zo ne kwanaki biyar kafin bikin cika shekaru sittin da bakwai da kawo karshen Yakin Duniya na Biyu, lokacin da Korea ta Kudu ta samu 'yancin kai daga mulkin mallakar Japan.

Wadansu mazauna Seoul sun bayyana ra’ayoyinsu game da ziyarar.

A cewar mutum na farko, “Wannan ziyara ba wani abu ba ne”, yayin da wata mata ta ce, “Ziyarar za ta harzuka Japan—za a samu matsalar diflomasiyya tsakanin kasahen biyu”.

Japan ta fusata da ziyarar kuma tana shirin kiran jakadanta daga Seoul.

Yunkurin neman farin jini

Kafofin yada labarai na kasar ta Japan sun bayyana ziyarar da cewa wani yunkuri ne na ganin ya samu goyon baya daga masu kada kuri’a lokacin zabe.

Farin jininsa dai ya ragu tun lokacin da aka tsare dan uwansa a bisa zarge-zargen cin hanci.

Shugaba Lee Myung-bak na korea ta Kudu

Ziyarar Shugaba Lee Myung-bak zuwa tsibiran Dokdo ta jawo ce-ce-ku-ce

Takaddamar da ake yi game da wadannan tsibiran ta jima, tana kuma kawo tangarda a dangantaka tsakanin Japan da Korea ta Kudu.

Tsibiran dai na wani wuri ne mai arzikin kifi kuma akwai dimbin arzikin iskar gas a yankin.

Kasashen biyu dai sun shafe shekaru aru-aru suna ikirarin mallakar tsibiran amma Korea ta Kudu ce ke da iko da su tun shekarar 1953.

Wannnan batu dai ya rikide zuwa rikici a shekarar 2005.

A lokacin da jakadan Japan a Seoul na wancan lokacin ya nanata ikirarin Tokyo, masu zanga-zanga a Korea ta Kudu sun yi ta bankawa kansu wuta suna kashe kansu.

Kari a kan wannan labari

Maudu'o'i masu alaka

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.