BBC navigation

'Tasirin hare-haren Boko Haram kan Maiduguri'

An sabunta: 14 ga Disamba, 2012 - An wallafa a 13:49 GMT
Jama'a a Maiduguri

Jama'a da dama sun kauracewa birnin Maiduguri sakamakon rikicin

Wakilin BBC Jimeh Saleh ya kai ziyara zuwa mahaifarsa ta Maiduguri a Arewacin Najeriya a karon farko cikin shekara guda - inda ya tarar da garin a cikin wani mawuyacin hali sakamakon munanan hare-haren da kungiyar Boko haram ke kaiwa.

A daidai lokacin da rana ke shirin faduwa; duhu kuma na kara yi, wani ladani na rangada kiran salla.

Karar muryarsa na tashi daga saman daya daga cikin tsaffin masallatai na birnin.

Jama'ar musulmai sun gudanar da sallah Magrib - inda suke hada wa da Isha'i saboda akwai dokar hana zirga-zirga daga karfe bakwai zuwa shida na safe.

Halin da ake ciki a yanzu na rashin tabbas da tsaro - ya sha banban da birnin Maiduguri da na taso a ciki.

Halin kunci

"mafi yawan jama'a sun koma ga Allah domin yin addu'a ko an samu zaman lafiya da kwanciyar hankali - wanda a baya shi ne taken mahaifata ta Maiduguri"

A 'yan watannin da suka wuce, kungiyar Boko Haram ta kaddamar da hare-hare a sassan Najeriya da dama - ciki harda na bama-bamai a Maiduguri.

Na isa Maiduguri bayan na dawo daga London a karon farko cikin shekara daya, birnin na nan cikin kamar yadda na barshi - sai dai talauci ya karu - haka kuma jama'ar garin masu hazaka da hadada.

Babu masu motocin haya, masu bara, da shaguna wadanda ke kaiwa dare suna harkokinsu.

Boko Haram


* 2002: Aka kafa kungiyar

* 2009: An kashe daruruwan mutane lokacin boren Maiduguri; inda aka kama shugabansu Muhammad Yusuf sannan aka kashe shi

* Dec 2010: Sun kai harin bam a Jos, wanda ya kashe mutane 80; an kuma zarge su da kai hari a lokacin sabuwar shekara a wani barikin soji a Abuja

* Jun-Aug 2011: Harin bam a hedkwatar 'yan sanda da ke Abuja da kuma ofishin Majalisar Dinkin Duniya

* Dec 2011: Hare-haren bama-bamai sun kashe mutane da dama a ranar Kirsimeti

* Jan 2012: Tashe-tashen hankula a yankin Arewa maso Gabas

*Jan 2012: Hare-haren bama-bamai sun kashe akalla mutane 200 a jihar Kano

*Afrilu 2012: Hari kan ofishin jaridar Thisday a Abuja da kuma Kaduna

A yanzu jama'a ba sa iya cin abinci sau ukku a rana.

Masu hada-hadar gidaje na cewa a yanzu harkar babu riba, wasunsu ma asara suke tafkawa.

"Rufe shago karfe 7 na yamma daidai yake ace mutum ya yi aikin rabin rana," a cewar wani masanin tattalin arziki a jami'ar Maiduguri, wanda kamar yawancin mutane, ya nemi a saya sunansa.

"Muna cikin matukar tsoro," kamar yadda wani mazaunin birnin ya shaida min, "kuma kai kadai ne dan jaridar da zan iya magana da shi, saboda kaima na sanka, amma don Allah kar ka bayyana sunana."

Mutane da yawa sun kauracewa Maiduguri watanni da dama da suka gabata saboda kashe-kashen da ake yi, inda suka bar gidajensu a kargame.

Wasu daga cikin attajiran birnin sun yi kaura da harkokin kasuwancinsu zuwa wasu biranen.

An zargi sojoji

An kafa dokar tabaci a Maiduguri bayan da aka kai harin ranar kirsimetin 2011 a Abuja da Jos wanda ya yi sanadiyyar mutuwar mutane 40.

Tun daga wancan lokaci, sojoji dauke da muggan makamai suka kafa shingayen bincike a sassa daban-daban na birnin, tare da tsaurara matakan tsaro a majami'u da ofisoshin 'yan sanda da sauran wuraren da Boko Haram ke kaiwa hari.

An tura sojojin ne domin su kare mazauna birnin - sai dai baki ya zo daya wurin yin Alla-wadai da dokar hana zirga-zirgar da aka sanya da kuma yadda suka mamaye titunan birnin.

Sun zargi sojojin da cin zarafin jama'a da sauran laifuka masu alaka da cin zarafin bil'adama.

Maiduguri

Wannan batu na kara jefa mutane da dama cikin hadari

Da zarar an kai hari, sai sojoji su shiga unguwanni suna farautar mutane a cikin gidaje tare da nakadawa maza duka.

Sojojin dai sun musanta wannan na faruwa - amma abu ne mai wuyar musantawa saboda yadda jama'a ke nanata shi a kodayaushe.

Dandalin kasuwanci

Babban layi ne wurin da aka fi yin hada-hadar kasuwanci a birnin ta hanyar sayar da kayayyakin sawa, da na latironi da sauran kayan al'amura na yau da kullum.

Kwarori da 'yan Chadi da sauran jama'a na fadi tashin futuka a wannan wuri domin amfana daga arzikin da ke akwai - sai dai a yanzu komai ya tsaya a wurin.

Daga cikin 'yan wadanda da suka yi sa'a su ne masu sayar da kekuna da kuma kani-kawa: Kasuwar kekuna ta bude tun bayan da aka hana hawa babur a bara sakamakon hare-haren da ake kaiwa a kan baburan.

Sai dai duk da haka wasu da dama na fatan abubuwa za su daidaita a birnin Maiduguri, mafi yawa kuma sun koma ga Allah domin yin addu'a ko an samu zaman lafiya da kwanciyar hankali - wanda a baya shi ne taken mahaifata ta Maiduguri.

Kari a kan wannan labari

Maudu'o'i masu alaka

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.