An sabunta: 23 ga Satumba, 2011 - An wallafa a 13:29 GMT

An yi jana'izar tsohon shugaban Afghanistan

Jana'izar tsohon shugaban Afghanistan

Ranar Talata ne aka kashe Rabbani a gadansa da ke Kabul

An yi jana'izar shugaban majalisar sasantawa ta Afghanistan, kuma tsohon shugaban kasar Burhanuddin Rabbani, wanda dan kunar bakin wake ya kashe a birnin kabul.

An tsaurara matakan tsaro a wajen jana'izar wacce aka gudanar a fadar shugaban kasa - inda kuma shugaba Karzai ya halarta.

Daga nan ne kuma aka bunne gawar Rabbani cikin wani yanayi na dimuwa da jimami.

Rabbani, wanda shi ne shugaban Majalisar koli ta sasantawa a kasar, an kashe shi ne ranar Talata bayan da wani dan kunar bakin wake dauke da bom a rawani ya shiga gidansa a matsayin wakilin Taliban.

Ci gaba ta tattaunawa

Shugaba Hamid Karzai ya gayawa mahalarta jana'izar cewa zai ci gaba da shirinsa na samar da zaman lafiya a kasar.

"Jinin da aka zubar na wadanda suka yi shahada na bukatar mu ci gaba da yunkurinmu har sai mun samar da zaman lafiya," a cewarsa.

"Hakkinmu ne mu tunkari wadanda suke adawa da zaman lafiya."

Mr Karzai ya zargi wadanda suka kashe Rabbani da "manakisa da kuma yaudara", tare da cin zarafin Afghanistan da kuma sabawa sharudan addinin Musulunci.

Dan mamacin Salahuddin, ya shaida wa mahalarta jana'izar cewa: "Yau rana ce da muke shaida daya daga cikin munanan abubuwan da suka faru a tarihin siyasar wannan zamani."

Jama'a sun dimauce lokacin da gawar Rabbani ta isa wurin da za a bunne shi.

An kuma ji karar harbin bindiga amma 'yan sanda sun ce sun yi harbi sama domin tarwatsa dandazon jama'ar da ke jefa duwatsu kan ayarin motocin jami'an gwamnati.

Wasu daga cikin mutanen sun yi ta yin kalaman batanci ga Amurka da Pakistan da kuma shugaba Karzai.

BBC navigation

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.