Ukraine: Amatora mashya mu mpera y'umwaka

  • 21 Ukwa kabiri 2014
Umukuru wa Ukraine, Viktor Yanukovych

Muri Ukraine perezida Viktor Yanukovych yatangaje ko hazaba amatora mashya mu kwezi kwa cumi na kabiri.

Yongeyeho ko hagiye gutangira igikorwa cyo gushyiraho leta y'ubumwe bw'igihugu.

Ariko abarwanya ubutegetsi bwa perezida Yanukovych n'abahuza b'amahanga ntacyo bari bavuga kuri ayo makuru.

Mbere y'aho uyu munsi ibiro by'uwo mukuru w'igihugu byari byavuze ko leta, abayobozi b'abarwanya ubutegetsi, intumwa zo mu muryango w'ibihugu by'Uburayi n'Uburusiya bageze ku mwumvikano mu biganiro byaraye bibaye.

Ariko ministiri w'ububanyi n'amahanga w'Ubufaransa yasabye ko byitonderwa, avuga ko ubwo bwumvikane budahagije, kandi ko ibiganiro bigikomeje.

Ibiri muri ayo masezerano ntibyavuzwe.

Umunyamakuru wa BBC yavuze ko perezida Yanukovych akomeje kotswa igitutu kugirango amatora mashya akorwe vuba.

Ejo n'ijoro mu kanama kihutijwe, inteko nshingamategeko yo muri Ukraine yafashe umwanzuro wo gusubiza ingabo zishinjwe umutekano mu birindiro byazo.