Somalia: Igitero ku ngoro ya perezida

  • 21 Ukwa kabiri 2014
Perezida wa Somalia, Hassan Sheikh Mohamud

Intagondwa zigendera ku matwara akaze y'idini ya Isilamu zagabye igitero ku ngoro y'umukuru w'igihugu mu murwa mukuru, Mogadishu.

Amakuru avuga ko, mu gutangira icyo gitero abo barwanyi bagongesheje imodoka yuzuyemo ibisasu urupangu rw'iyo nzu, mbere yo kugerageza kwinjiramo ku ngufu.

Humvikanye urusaku rw'ibisasu n'urufaya rw'amasasu.

Ariko intumwa idasanzwe ya LONI muri icyo gihugu, Nick Kay, yavuze ko perezida wa Somalia, Hassan Sheikh Mohamud, yamubwiye ko ntacyo yabaye, yongeraho ko icyo gitero cyabaye impfabusa.

Ministiri w'umutekano, Abdi Karim Hussein, yavuze ko bamwe muri izo ntagondwa bishwe, kandi ko hari n'abandi bafashwe.

Umutwe w'intagondwa wa al-Shabaab wavuze ko ariwo wagabye icyo gitero, kandi wongeraho ko imirwano igikomeje.