Bangkok: umutekano muke mbere y'amatora

Abigaragambya ntibashaka leta ya Yingluck Shinawatra
Abigaragambya ntibashaka leta ya Yingluck Shinawatra

Mu murwa mukuru wa Thailand, Bangkok, humvikaniye ibintu biturika n'urusaku rw'amasasu mu gihe abashyigikiye leta bakozanyagaho b'abatavuga rumwe nayo mu gihe kandi bucya muri icyo gihugu haba amatora rusange.

Abantu benshi bakomeretse igihe amasasu yaraswaga n'ibisasu bikanagwa muri uko gukozanyaho kwabereye mu majyaruguru y'uwo mujyi.

Ishyaka rikomeye kurusha ayandi mu mashyaka atavuga rumwe na leta yanze kwitabira ayo matora.

Rirasaba ahubwo leta iriho ko yasimburwa n'akanama kagizwe n'abantu badatowe.

Abayoboke b'amashyaka atavuga rumwe na leta barimo kugerageza kubuza ko amakarita y'itorwa yoherezwa mu biro by'amatora.

Ishyaka riri ku butegetsi rifite abayoboke benshi mu byaro bagizwe cyane n'abakene bibanze ahanini mu majyaruguru n'uburasirazuba bw'icyo gihugu.

Abayoboke b'amashyaka arwanya leta bo biganje mu murwa mukuru Bangkok no mu majyepfo y'igihugu.