al-Shabab, ni bande?

Umutwe wa al-Shabab
Abarwanyi b'umutwe wa al-Shabab

Al-Shabab n'iki?

al-Shabab, mu cyarabu bivuga abasore. al-Shabab yatangiye mu mwaka wa 2006 ari umutwe w'insoresore z'umutwe w'intagondwa z'abayisilamu muri Somaliya witwaga - Union of Islamic Courts. Uwo mutwe wari mu ntambara n'ingabo za Ethiyopiya zari zishyigikiye leta y'agateganyo itari ifite ingufu. Hari amakuru avuga ko muri al-Shabab harimo abarwanyi b'abanyamahanga bavuga ko barwanira idini ya kiislamu. Amakuru avuga ko al-Shabab ifitanye isano na al-Qaeda. Uwo mutwe w'al-Shabab ushobora kuba ufite abarwanyi bari hagati ya 7000- 9000, uri ku rutonde rwateguwe n'Ubwongereza n'Amerika rw'imitwe y'ibyihebe. Mu turere uwo mutwe ugenzura, utegeka kubahiriza amategeko akomeye ya Sharia, nko kwicisha amabuye abagore basambanye no guca abajura amaboko.

al-Shabab igenzura akarere kangana gute?

N'ubwo al-Shabab imaze gutakaza imijyi , iracyagenzura akarere kanini mu giturage. Mu kwezi kwa 8, umwaka wa 2011 yakuwe mu murwa mukuru, Mogadishu, mu kwezi kwa 9, 2012, ikurwa ku cyambu cya Kismayo. Umujyi wa Kismayo wari ukomeye cyane kuri al-Shabab kubera ko yawukoreshaga mu kohereza ibikoresho mu karere igenzura kandi yakuraga amafaranga mu misoro. al-Shabab ariko iracyagaba ibitero by'ubwiyahuzi mu mujyi wa Mogadishu.

Abasesenguzi baravuga ko ubu al-Shabab ikoresha uburyo bwo kurwana kinyeshyamba ihangana n'ingabo z'Afurika zirwana muri Somaliya. Kuva aho ingabo za Kenya zinjiriye muri Somaliya muri 2011, ibitero kuri al-Shabab byariyongereye. Ingabo za Kenya zitera al-Shabab ziturutse mu majyepfo ya Kismayo. Naho ingabo za Ethiyopiya zateye zituruka mu burengerazuba zifata imijyi ya Beledweyne na Baidoa.

Ninde muyobozi wa al-Shabab?

al-Shabab iyoborwa na Ahmed Abdi Godane uzwi ku zina rya Mukthtar Abu Zubair. Akomoka muri Somaliland.

al-Shabab ikorana nande mu mahanga?

al-Shabab yiyunze na al-Qaeda muri 2012. Umuyobozi w'al-Shabab avuga ko akurikirikiza amabwiriza ya Ayman al-zawahir, umuyobozi w'al-Qaeda.

Ninde ushyigikiye al-Shabab?

Eriteriya nicyo gihugu cyonyine mu karere gikorana na al-Shabab, ariko Eriteriya irabihakana. Eriteriya itera inkunga al-Shabab kubera ko iyifasha mu kurwanya Ethiyopiya.

Mu mwaka wa 2006, Ethiyopiya yohereje ingabo muri Somaliya ibifashijwemo n'Amerika. Ingabo za Ethiyopiya zavuye muri Somaliya mu mwaka wa 2009 imaze gutakaza abasirikare benshi. Yasubiyeyo muri 2011, ubu Ethiyopiya iravuga ko izashyira akarere igenzura mu maboko y'ingabo z'Afurika.