Nid yw'r cynigion M4 yn cynnwys 'opsiynau eraill'

Cymorth

Nid yw'r cynigion M4 yn cynnwys opsiynau eraill ar wahan i adeiladu heol newydd, yn ôl tystiolaeth a glywyd gan grŵp o ACau.

Bu'r Pwyllgor Amgylchedd a Chynaliadwyedd yn gwrando ar dystiolaeth gan nifer o sefydliadau ar eu hymchwiliad i gynigion llywodraeth Cymru ar gyfer yr M4 o amgylch Casnewydd, ar 6 Tachwedd 2013.

Yn ôl y Ffederasiwn Busnesau Bach (FSB), nid yw cynlluniau'r llywodraeth yn ystyried nifer o gynigion eraill ac nid yw'n ystyried yr "effaith ehangach".

Dywedodd yr FSB nad oedd pryderon economaidd, amgylcheddol a fforddiadwyedd wedi cael eu "cydbwyso'n ddigonol", ac nid oedd yn cynnwys gwybodaeth am gostau'r ffyrdd lliniaru arfaethedig.

Fe wnaeth ACau hefyd glywed tystiolaeth gan yr Athro Stuart Cole o Brifysgol Morgannwg a gyflwynodd gynlluniau eraill ger bron y pwyllgor ar gyfer ffordd liniaru newydd, a fyddai'n costio £380m, mae traean o'r pris a gynigiwyd gan y llywodraeth, sef £936m.

Disgrifiodd yr Athro Cole y prosiect fel "breuddwyd peiriannydd" a honnodd fod ei gynnig yn opsiwn "ymarferol yn hytrach na deniadol o ran ei ddelwedd".

Cytunodd Mike Webb o RSPB Cymru y byddai cynigion yr Athro Cole yn "llai niweidiol i'r amgylchedd" a chroesawodd y ffaith y byddai'n costi draean o'r gost a chynigwyd gan y llywodraeth.

Fe wnaeth Mr Webb godi pryderon bod yna "absenoldeb tystiolaeth" yn y dogfennau ymgynghori ar hyn o bryd ar y twf economaidd.

Dywedodd: "Nid oedd unrhyw dystiolaeth y byddai twf economaidd yn sgil y ffordd M4 newydd, nid oes ystadegau ar y twf economaidd a beth fyddai'r raddfa economaidd."

Bu'r pwyllgor hefyd yn gwrando ar dystiolaeth gan Gynghrair Trafnidiaeth De-ddwyrain Cymru a oedd wedi beirniadu cynigion y llywodraeth ar "ddiffyg presenoldeb mesurau trafnidiaeth gyhoeddus".

Fe wnaeth Keith Jones o Sefydliad Peirianwyr Sifil Cymru gloi'r cyfarfod, gan bwysleisio y byddai traffordd newydd o amgylch Casnewydd yn hanfodol i economi Cymru.

Pwysleisiodd: "Mae angen draffordd, ni allwch gael Cymru ar ei hol hi".

Watch this in English

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.