Pwyllgor Iechyd a Gofal Cymdeithasol

Cymorth

Galwodd y Comisiynydd Plant Keith Towler unwaith eto am wahardd taro plant ar 2 Mai 2013.

Roedd yn rhoi tystiolaeth i'r pwyllgor iechyd sy'n craffu ar y Mesur Gofal Cymdeithasol a Llesiant.

Mae eisoes wedi codi'r mater yn ei dystiolaeth i'r Pwyllgor Plant a Phobl Ifanc ar yr un mesur.

"Rydw i wedi dweud erioed y dylai llywodraeth Cymru fanteisio ar y cyfle cyntaf i wahardd taro plant," meddai.

"Byddai'n rhoi eglurdeb i bobl sy'n gweithio ym maes plant i weithio gyda rhieni mewn ffordd bositif a gallu bod yn gwbl ddiamwys bod curo plentyn ... yn erbyn y confensiwn (Ewropeaidd ar hawliau'r plentyn).

"Byddai'n ddefnyddiol tu hwnt."

Gofynnodd aelod Plaid Cymru Lindsay Whittle - sy'n adnabyddus am ei gefnogaeth i wneud taro plant yn anghyfreithlon - i Mr Towler i ddweud ei farn yn glir fel ei fod "yn y cofnod".

"Mae hwn yn gyfle euraid" meddai.

"Rydym ni'n gwybod y daw gwaharddiad maes o law, er mwy dyn gadewch i ni ei wneud e nawr."

Trafododd Mr Towler hefyd ei bryderon bod y ddeddfwriaeth arfaethedig ar gyfer oedolion yn ogystal â phlant.

Pan ofynnwyd iddo a oedd o'r farn y dylid creu deddf ar wahân i blant, dywedodd nad oedd hynny'n "angenrheidiol" ond bod angen "eglurdeb" yn y mesur.

Hefyd yn rhoi tystiolaeth i'r pwyllgor roedd Jeff Farrar, Cymdeithas Prif Swyddogion Heddlu Cymru; Richard Booty, Gwasanaeth Cenedlaethol Rheoli Troseddwyr; Sarah Payne ac Ian Barrow, Ymddiriedolaeth Prawf Cymru; Anna Buchanan o swyddfa'r Comisiynydd Pobl Hyn a Michelle Dunwoody o fwrdd iechyd Betsi Cadwaladr.

Mae rhan gyntaf y pwyllgor i'w weld yma.

Read this in English

Copyright © 2017 BBC. Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.