Y pwyllgor amgylchedd

Cymorth

Amddiffynodd y gweinidog sy'n gyfrifol am amaethyddiaeth, Alun Davies, y ffordd iddo ymateb i'r problemau achoswyd gan y tywydd gwael ar 1 Mai 2013.

Roedd yn ymateb i gyhuddiadau gan Llŷr Huws Gruffydd a William Powell yn ystod cyfarfod o'r pwyllgor amgylchedd.

Y pwnc dan sylw yn ystod y sesiwn oedd ymateb y gweinidog i'r tywydd gwael achosodd broblemau difrifol i ffermwyr ledled Cymru, ac yn enwedig yn y gogledd, yn ystod mis Mawrth eleni.

Gofynnodd Mr Gruffydd o Blaid Cymru a oedd Mr Davies yn credu bod ei agwedd yn ystod y trafferthion wedi bod yn "ansensitif a chwbl sarhaus".

Roedd y Democrat Rhyddfrydol William Powell yn rhannu pryderon Mr Gruffydd ynglŷn ag ymateb y gweinidog.

Honnodd bod Mr Davies wedi sôn am ei gefndir fel "ymgynghorydd llwyddiannus" yn ystod cyfarfod gyda ffermwyr oedd yn dioddef anawsterau yn sgil y tywydd gwael.

Yn ôl Mr Powell, fe gymharodd Mr Davies broblemau ffermwyr gyda siop bapur newydd oedd heb werthu losin am ychydig o ddiwrnodau oherwydd yr eira.

"Ydych chi'n derbyn bod eich sylwad yn annoeth yn y cyd-destun o'r boen i ffermwyr ei ddioddef?" gofynnodd Mr Powell.

Gwadodd y gweinidog y cyhuddiad.

Dywedodd ei fod wedi siarad am "lawer o faterion gwahanol" yn ystod y cyfarfod ac y byddai'n "anghyfrifol ond dweud yr hyn mae pobl eisiau ei glywed".

"Y pwynt roeddwn yn ei wneud oedd bod llawer iawn o fusnesau wedi eu heffeithio gan y tywydd a gan amgylchiadau tu hwnt i'w rheolaeth," meddai Mr Davies.

"Fe soniais am fy mhrofiadau personol oherwydd fy mod i yn deall yr anawsterau mae pobl y byd busnes yn ei wynebu.

"Dyna'r pwynt oeddwn i'n ceisio ei gyfleu."

Trafododd aelodau'r pwyllgor bolisi dŵr Cymru hefyd yn ystod y cyfarfod.

Dywedodd y gweinidog ei fod yn hoffi'r syniad o ehangu'r defnydd o fesuryddion dŵr "ar lefel ddeallusol" ond ei fod hefyd yn poeni y gallai gwneud hynny gael effaith anghymesur ar bobl dlawd.

Tuag at ddiwedd y cyfarfod gofynnodd yr aelod Llafur Julie Morgan am y newyddion diweddaraf ynglŷn â'r mesur cŵn peryglus.

Dywedodd Mr Davies ei fod yn bwriadu gwneud cyhoeddiad yn ystod yr wythnos nesaf.

Watch this in English

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.