Cafodd y Prif Weinidog Carwyn Jones ei feirniadu am newid polisi'r llywodraeth ar brofion iechyd i bobl dros 50 tra'n cael ei holi ar 5 Chwefror 2013.

Un o addewidion maniffesto Llafur yn 2011 oedd cynnig y profion, ond bellach y bwriad yw eu cynnig ar-lein.

Dywedodd y gweinidog iechyd mewn datganiad ar 4 Chwefror bod cwestiynau ynglŷn â pha mor werthfawr fyddai hi i bawb gael prawf iechyd.

Beirniadodd arweinydd y Democratiaid Rhyddfrydol y cynnig.

Holodd Kirsty Williams pa mor wahanol y byddai'r profion i'r myrddiynau sydd ar gael ar-lein yn barod a beth oedd y cyfiawnhad dros y newid gan i Lafur hawlio mai nhw oedd â'r maniffesto wedi ei wirio fanylaf yn 2011.

Mynnodd Mr Jones bod y llywodraeth yn gweithredu ar yr addewid maniffesto a dywedodd bod yr holiadur "ar-lein yn gam cyntaf" ac yn cyfeirio pobl at eu meddyg os oes angen.

"Rwy'n edrych ymlaen i weld manylion y system gyfrifiadurol a sut y bydd yn sicrhau bod manylion cleifion yn aros yn breifat," oedd ymateb Ms Williams.

Aeth ymlaen wedyn i holi'r prif weinidog am wlâu mewn unedau gofal dwys.

"Does dim un wlad arall yn Ewrop sydd a llai o wlâu gofal dwys na Chymru," meddai.

"Oes ryfedd bod y gwasanaeth iechyd - yn eich cyfnod chi wrth y llyw ac i ddefnyddio'ch geiriau chi - 'ar ddymchwel'?"

Mynnodd y prif weinidog bod arweinydd y Democratiaid Rhyddfrydol wedi ei gamddyfynnu gan ddweud mai ei ofn yw y bydd y gwasanaeth iechyd yn dymchwel os nad oes newidiadau.

Holodd arweinydd y Ceidwadwyr Andrew RT Davies y prif weinidog am y nifer o fyfyrwyr sy'n gwneud cais am le prifysgol a gofynnodd arweinydd Plaid Cymru am gael ystadegau GDP penodol i Gymru.

Yn ogystal ag ymateb i gwestiynau arweinwyr y gwrthbleidiau, atebodd Mr Jones gwestiynau ar doriadau i fudd-daliadau, darpariaeth band llydan yn Sir Benfro ac undebau credyd.

Read this in English